Моолдуң Кызыл хоорайда чиңгине консулу дээрги Цэндсүрэн Охиндоо-биле ужурашканын Тываның Баштыңы Владислав Ховалыг бодунуң блогунда бижээн.
Амгы үеде демнежип боттандырып турар төлевилелдерни олар сайгарып чугаалажып, чоокку келир үеде планнарны тодаратканнар. Бистиң чурттарывыстың аразында дипломаттыг харылзааларны тургусканының 105 чылынче онза кичээнгейни Владислав Ховалыг биле Цэндсүрэн Охиндоо угландырганнар. Юбилейни демдеглээриниң эгезин Россия биле Моолдуң Чепсектиг Күштериниң чыынды командаларының аразынга чоокта чаа Кызылга эрттирген спортчу маргылдаалар салган.
Тывага 2026 чылда болуп эртер IV делегей чергелиг буддийжи шуулганга моол делегация база келир. Ол болуушкун бистиң чоннарывыстың аразында эп-сеткил найыралын улам быжыглаарының база бир базымы-дыр деп республиканың удуртукчузу демдеглээн.
Бистиң корр.
Чурукту Тываның Баштыңының социал четкиде арнындан алган.
“Шын” №11 2026 чылдың март 26
