Май 24-те IX Бүгү-российжи «ЗаБег.РФ» чартык марафон болуп эрткен. Аңаа чиик атлетиканың профессионал спортчулары болгаш маңнаарынга ынак спортчулар, ниитизи-биле 1000 ажыг кижи киришкен.
Марафон киржикчилерин 10–14 харлыг оолдар, уруглар, 15–17 харлыглар аразынга болгаш 18 хардан өрү эр, херээжен спортчулар аразынга бөлүктеп чарган. Олар 1, 5, 10 болгаш 21 километр хемчээлдиг дистанцияга чарышканнар.
“Россияның 95 хоорайынга деңге эгелээн «ЗаБег.РФ» Бүгү-российжи чартык марафонга Тывадан 1000 кижи киришкен. Россияның кол маңнаар болуушкунунга бистиң республикавыстың чурттакчыларынга киржир арганы бергени дээш, Ксения Шойгуга удурткан оргкомитетке өөрүп четтирдивис!” — деп, Тываның Баштыңы Владислав Ховалыг демдеглээн.
Организакчыларның демдеглеп турары-биле 21 километрге Уран-оол Монгуш биле Айгуль Кувезин тулган чемпионнар болган. Мөңгүн медальдарга – Айдың Сат биле Сайзана Хомушку, хүлер медальдарга Сергей Куулар биле Айлана Ооржак төлептиг болганнар. Ол ышкаш боттарының тус-тузунда бөлүктеринге Илья Гераськин, Радик Донгак болгаш Мария Зотова бир дугаар маңнажып келген.
Шак мындыг марафонну Россияда чылдың-на эрттирип турар. Ооң кол сорулгазы – чиик атлетиканы нептередип, кадык-чаагай амыдыралды деткиири. Бо чылгы чартык марафонга ниитизи-биле 170 муң ажыг кижи киришкен.
Бистиң корр.
Буян Ооржактың тырттырган чуруктары.
«Шын» №20 от 2025 чылдың май 29