Наадым байырлалының ийиги хүнү Тос-Булакка болган. Аңаа ТР-ниң Баштыңы Владислав Ховалыг, ТР-ниң Дээди Хурал Даргазы Каң-оол Даваа чыылган чонга Наадым-биле байыр чедиргеш, мурнакчы малчыннарга шаңналдарны тывыскан.
Республиканың бүгү кожууннарында чайның изии, кыштың соогу дивейн малын малдап чоруур эрес-кежээ чемпион малчыннар:
Чөөн-Хемчик кожууннуң Ийме сумузундан Каң-оол Ондар, Мөңгүн-Тайганың Мөген-Бүренден Эрес-оол Иргит, Кызыл кожууннуң Кур-Черден Дашмир Куулар, Өвүрнүң Сарыг-Хөлден Чаян Баазаң, Бай-Тайганың Бай-Талдан Буян Хаван-оол, Тес-Хемниң О-Шынаадан Март-оол Шокар, Сүт-Хөлдүң Алдан-Маадырдан Эрес Ооржак, Улуг-Хемниң Эйлиг-Хемден Александр Адас, Барыын-Хемчиктиң Шекпээрден Владимир Моңгуш, Эрзинниң Бай-Хөлден Орлан Сагды, Чаа-Хөл кожуундан Мариана Сүктер, Тожунуң Тоора-Хемден Виктор Самбуу, Каа-Хемниң Бүрен-Хемден Мерген Моңгуш, Чеди-Хөл кожуундан Николай Бүрбүжүк, Бии-Хем кожуундан Сайдаш Ондар, Таңдының Балгазындан Юрий Моңгуш, Тере-Хөл кожуундан Орлан Шыырап дээш ниитизи-биле 17 малчын 2023 чылдың Наадымынга бирги чергениң чемпиону деп төлептиг атты алганнар.
Дараазында 2-ги болгаш 3-кү черни 34 малчын алган. Оларның аразында тыва кижиниң чеди чүзүн малының доозазын-даа азырап чоруурлары бар.
Бо чылгы малчыннар байырлалынга чүгле чемпионнарны эвес, а ооң мурнунда-ла чемпион деп төлептиг атты ап каапкаш, ам-даа мал-маганын өстүрүп чоруурларга күрүне шаңналдарын, ТР-ниң Баштыңының, Дээди Хурал Даргазының өөрүп четтириишкин бижиктерин болгаш хүндүлел бижиктерни тывыскан.
Айдың Ондар.
Буян ООРЖАКТЫҢ тырттырган чуруктары.
"Шын" №61, 2023 чылдың август 19
