2022 чылдың июль 4-те «Наадым–2022» республика байырлалын эрттирериниң дугайында Доктаалга Тываның Баштыңы Владислав Ховалыг атты салган.
Август 13 – байырлал эрттирер хүннү документиде доктааткан. Ол хүн суббота хүнүнге таваржып турар болганда, дыштаныр хүннү вторникче, август 16-же, чылдырган.
Август 15 – Республика хүнү. Ынчап кээрге Наадым болгаш Республика хүнүнде регионалдыг хоойлу езугаар республиканың чурттакчылары 4 хүн улай дыштаныр, август 13-тен 16-га чедир.
Малчыннар байырлалы Наадымны бо чылын Кызыл хоорайдан ырак эвесте Тос-Булак деп черге байырлаар. Наадымның байырлыг хемчеглерин республиканың организастыг комитединиң кежигүннери организастаар.
Байырлыг хемчеглер эрттирериниң материал-техниктиг болгаш саң-хөө айтырыгларын шиитпирлээр даалганы ТР-ниң Көдээ ажыл-агый болгаш аъш-чем, Культура болгаш туризм база Спорт яамылары алган.
Тыва Республика талазы-биле Иштики херектер яамызынга байырлал хүннеринде хөй-ниитиниң болгаш орук-транспорт айыыл чок чоруунуң камгалалының чурумун күштелдирерин сүмелээн.
Бистиң корр.