Малчыннар байырлалы Наадымга чедир ай четпес хүннер арткан дээрзин Тываның Баштыңы Владислав Ховалыг бодунуң блогунда бижээн.
«Наадымны Тывага июль 18–20 хүннеринде эрттирер. Байырлал болур хүннерни малчыннарның күзелдерин өөренип көрүп тургаш, оларны ажылындан чардыктырбазы-биле доктаадып тургускан.
Тываның Культура яамызы тулган культура программазын белеткеп турар. Бо болур Наадымны Тываның ССРЭ-ге эки тура-биле каттышканының 80 чыл оюнга тураскаадып эрттирер. Ылаңгыя Наадымның байырлыг ажыдыышкынында Совет Эвилелинге бистиң республика каттыжып турар үезиниң ырыларын бараалгадыр.
Корум-чурум хандырылгазы — бирги чергениң сорулгазы. Организакчылар корум-чурум камгалакчылары-биле сырый ажылдаар ужурлуг. Ылаңгыя спортчу хемчеглер эрттирип турар үеде.
Ол ышкаш «Үстүү-Хүрээ» фестивалының белеткелин база чугаалаштывыс. Фестиваль үзүктелиишкин соонда ам база Чадаана хоорайга июль 9–11 хүннеринде болур. Тус черниң эрге-чагыргазынга организакчыларга деткимчени көргүзер кылдыр даастым. Чүнүң-даа мурнунда фестивальдың аалчыларынга айыыл чок чорук болгаш корум-чурум айтырыын көөр ужурлуг. Тываның Экономиктиг хөгжүлде яамызынга фестиваль үезинде ус-шеверлерниң ажылдарын садып-саарып турар хуу сайгарлыкчыларны киириштирерин даастым».
Бистиң корр.
"Шын" №47 2024 чылдың июнь 26
