Ак-Довурак хоорайның Уругларның уран чүүл бажыңынче 700 ажыг оолдар, уруглар барып турар.
Ында “Өөредилге” национал төлевилелдиң иштинде “Уруг бүрүзүнүң чедиишкини” федералдыг төлевилел-биле немелде өөредилгеде чаа олуттар тургустунган. Ак-Довурактың өөреникчилери чаа чадаг-тергелер, турисчи эт-херекселдер болгаш хаактар-биле дериттинген “Велотуризм”, “Хаак чарыжы” деп чаа бөлгүмнерже улуг өөрүшкү-биле барып турар. Бо угланыышкыннарны Ай-Хан Сарыглар удуртуп турар. Турисчи сезоннуң эгелээни-биле чалыы турисчилер Кижи көжээ, Үттүг-Хая, Суглуг-Ой болгаш төрээн чериниң оон-даа өске чурумалдыг черлеринче кончуг солун маршруттар-биле чоруп турарлар. А кышкы үеде чарыштарын эрттирерлер.
“Бистиң уругларывыс 18 аңгы бөлгүмнер болгаш секцияларны хаара туткан Уругларның уран чүүл бажыңынче күзелдии-биле барып турарын көөрге, дендии таарымчалыг-дыр. Оолдар чылыг үеде чадаг-терге туризминде чоруп турда, уруглар база олардан чыда калбас. Ажылдап кылып каан белен турисчи маршруттар бар. Чаа чылдың дыштаныр хүннеринде хаак чарыжынга маргылдаалар эрттирген бис. Аңаа уруг бүрүзү боттарының аваангыр-кашпагайын, шыдамыын көргүскеннер. Чылыг үе дүжерге турисчи бөлгүмнерни эгелээр бис. Бо бүгү шупту “Өөредилге” национал төлевилелдиң “Уруг бүрүзүнүң чедиишкини” төлевилелдиң ачызында болдуна берген”– деп, Уругларның уран чүүл бажыңының директору Ай-Мерген Дамчыт демдеглээн.
Россияның Президентизиниң эгелээни “Өөредилге” национал төлевилел 5 дугаар чыл боттанып турар. Ооң ачызында Тываның 80 ажыг көдээ школаларында немелде өөредилге болгаш күш-культура, спорт кичээлдерин эрттирер эптиг байдалдарны тургускан. Ынаар школаларга театрлар, музейлер, медиатөптер тургузары база кирип турар.
Өөредилге яамызының медээлеринден Чыжыргана Саая белеткээн.
Чуруктарны интернеттен алган.
“Шын” №15 2024 чылдың февраль 28
