Кызылда Совет Тываның 5 чыл аттыг стадионунга база “Кадыкшылдың оруу” деп чадаг-терге оруунга сентябрь 21-де Бүгү-россияда 2015 чылдан тура “Спорт – чуртталганың хемчээли” деп төлевилелди боттандырары-биле чурттуң шупту девискээрлеринде ышкаш маңнаарының хүнүн бичии оолдар, кыстар, школачылар, студентилер, шеригжилер, шыырак спортчулар 3 назы-харлыг бөлүкке шупту кожууннардан база Кызыл хоорайдан 490 маңнакчы, калбаа-биле, 1 км, 4 км, 6 км, 8 км, 12 км хемчээлдерге күжүн шенеп киришкеннер.
Спорт яамызының маргылдаалар эрттирер болгаш ажыл-агый харыылаар эргелелиниң директорунуң оралакчызы Эрес Ачыты, “Нацияның крозу–2024” ажыдып тура, киржикчи бүрүзүнге чедиишкиннерни күзээн соонда, маргылдааның кол шииткекчизи Аржаан Күжүгет база кол секретары Алдын-Сай Кара-Сал ол ышкаш өске дузалакчы шииткекчилер хүлээлгезин күүседип кирипкеннер. Эң узун хемчээлдиг чарыш Каа-Хем суурда “Серебрянка” эмнелгезиниң чанындан үнгеш, хем кыдыында чадаг-терге оруун куду халааш, “Цеченлинг” хүрээзиниң чанынга доктаап турган.
Түңнелинде, хемчээл аайы-биле дараазында тиилекчилер илерээн.
Эр улуска бичии 9 хар чедир оолдар аразынга 1000 метрге 1 дугаар черни – Арсений Лушков (үези 4,03 мин), 2-ги черде Аяс Монгуш (4,2 мин), 3 дугаарында Михаил Яковлев (4,41 мин). Дараазында 4000 метрге, 19 харга чедир оолдар аразынга, 1–3 черлерни алганнар: Сайын-Белек Ховалыг (14,36 мин), Энерел Монгуш (14,52 мин), Батый Баазан (14,56 мин). 19 харга чедир оолдарга 8000 метрге 1–3 черлерни алганнар: Дангырак Калбак (33,39 мин), Сайын Сынаа (34,20 мин), Доржу Маадыр-оол (34,39 мин). Эр улус 20 хардан өрү 4000 метрге 1–3 черлерни алганнар: Эльмир Хазеев (12,34 мин), Айдыс Тогаа (12,59 мин), Каң-Демир Оюн (13,15 мин). Эр улус 20 хардан өрү 12 000 метрге 1–3 черни алганнар: Уяраш Монгуш (42,27 мин), Денис Дмитриенко (44,32 мин), Меңги Шаравии (45,43 мин).
Херээжен бөлүк. Бичии 9 хар чедир уругларга 1–3 черлерни үлешкеннер: Дарый Монгуш (4,09 мин), Долзат Монгуш (4,29 мин), Софья Лушкова (4,3 мин). Дараазында 4000 метрге 19 хар чедир уруглар аразынга 1–3 черлерни алганнар: Солана Кендиван (17,11 мин), Тая-Чечээ Чазатмаа (17,36 мин), Надежда Санчы (17,46 мин). 19 хар чедир уругларга 6000 метрге 1–3 черлерде – Олча Шокпаа (30,57 мин), Анастасия Голубцова (31,24 мин), Церин Шаравии (32,58 мин). 20 хардан өрү 4000 метрге 1–3 черни алганнар: Буян-Кыс Донгак (18,15 мин), Анастасия Лушкова (19,28 мин), Олча Суманчик (19,58 мин). 20 хардан өрү 8000 метрге 1–3 черни алганнар – София Колядина (35,50 мин), Мария Зотова (37,26 мин), Чойганмаа Монгуш (39,02 мин).
Нацияның крозун эрттиреринге башкы колледжизиниң башкылары, сургуулдары база Росгвардияның шеригжилери идепкейлиг киришкеннер. Бөлүк бүрүзүнге тиилекчилер болгаш 2–3 дугаар чер алган спортчулар шаңналга медаль, диплом, кубоктарны алганнар база 1–10 дугаар чер алган спортчулар, Россияның Спорт яамызының тускай белек-селээнге төлептиг болганнар.
Алексей ЧАМБАЛ-ООЛ.
“Шын” №73 2024 чылдың сентябрь 25
