2024 чылдың июль 9-та регионнуң диспетчер албанының дыңнатканы-биле алырга, Тыва Республиканың арга-арыг фондузунуң черлеринде 523 га ниити шөлдүг дөрт арга-арыг өрттери хып турар.
Июль 8-те Тожу, Каа-Хем база Тере-Хөл кожууннарда Хамсара, Сизим, Сыстыг-Хем база Кунгуртуг арга-арыг участоктарында 1106,5 га ниити шөлдүг дөрт өрттү өжүрген. Таңды, Тере-Хөл, Каа-Хем база Тожу кожууннарда Бүрен-Хем, Хову база Кунгуртуг арга-арыг ажыл-агыйлар девискээринде 271,6 га шөлде беш өрттү чавырылдырган.
Кызыл, Тожу, Таңды кожууннуң арга-арыгларында өөскээн өрттерни өжүрер дээш, өртчүлер эрес-шудургу ажылдап турар. Өрттер өжүреринче 178 кижини база 16 санныг техниканы хаара туткан.
Өртчүлер арга-арыглыг черлерде, тайгаларда өрттерни өжүрер, оларның катап хөрлээлеп кыварын болдурбас дээш, хайгааралды чорудуп, от катап хып үнген черлерге өртке удур хемчеглерни ап турарга-даа, байдал дыка нарын. Агаар дыка изиг болгаш, эрги өрттер катап хып үнер, чаа өрттер кывар байдал тургустунган.
Өрттер-биле байдал дыка нарыыдаар чадавас. Тывада агаар-бойдустуң хайгааралын чорудуп турар албан черлериниң баш бурунгаар медээлери-биле алырга, июль 9–10 хүннеринде дыка изиир, 35 градус ажып, чамдык кожууннар, сумуларга 40 градус ажа бээр чыгыы. А июль 11-ден ыңай хүннерде күштүг хаттар хадыыр чадавас. А ол дээрге хөрлээлеп хып чыдар черлерлиг эрги өрттерниң катап өөскүп кыварынга, чаа өрттерниң дүрген тараарынга салдарлыг.
Тывада июль 1-де киирген “онза байдал” чуруму ам-даа күштүг. Онза чурум негелдези езугаар, кижилерниң арга-арыгже кирери кызыгаарлыг.
Ш. ЛОПСАН белеткээн.
Чурукту интернеттен алган.
“Шын” №51 2024 чылдың июль 10
