ТР-ниң Чазаа июльда хуу кижилерден өнчү-хөреңги үндүрүглериниң өрезин чыыр айны чарлап, агар санныг карталарын хаар, аай-дедир чоруурунга кызыгаарлаашкыннар дээш хоругдалдарны болдурбазы-биле үндүрүг албанында өрелерин төлээр арганы берген.
Үндүрүглер — кижи бүрүзүнүң күрүнеге төлээр ужурлуг акшазы-дыр. Шериг хандырылгазы, оруктар тудуу, пенсия болгаш пособие төлевири, эмнээшкиннер, өөредилге дээш, күрүнениң бодунуң ажыл-чорудулгазын хандырып күүседиринге херек акша-хөреңги болур.
Чурттакчы чон үндүрүг төлээринден ойталаар болза, башкыларның болгаш эмчилерниң шалыңынга, оруктар септелгезинге болгаш айыыл чок чорук хандырылгазынга акшаландырыышкын чок болу бээр. Ынчангаш үндүрүглерни үезинде болгаш долузу-биле төлээри – кижи бүрүзүнүң конститусчу хүлээлгези.
«Амгы үеде кижилерниң өнчү-хөреңги, чер болгаш транспорт үндүрүглеринге өрези 150 млн чедип турар. 2024 чылдың эгезинге деңнээрге, өре 58,1 сая рубль азы 28,2 хуу кызырылган. Үндүрүг эргелелиниң чоруткан ажыл-чорудулгазы-биле өрениң түңү элээн кызырылган» — деп, үндүрүг албаны дыңнадып турар.
ТР-ниң Чазааның 2024 чылдың июнь 25-те 373-р дугаарлыг айтыышкыны езугаар, өрелерни эвээжедир болгаш каттышкан бюджетти долдурар сорулга-биле, бо чылдың июльда республикада кижилерден өнчү-хөреңги үндүрүглеринге өрелер чыыр шалыпчы айны чарлап, бо чылдың август 1-ге чедир уламчылаарын айыткан.
Үндүрүг албанының ажылдакчылары өрелиг кижилерниң бажыңнарын кезип, чугааны чорудар. Банкоматтар болгаш терминалдар доктаамал ажылдаар. КАИ ажылдакчылары стационарлыг постуларга өре чыыры-биле рейдилерни чорудар.
Үндүрүг төлекчизи күрүне ачы-дуза порталында хууда кабинединден, кайы-даа банкының салбырындан азы почта салбырындан өрелерин төлеп болурун сагындыраалыңар. Тывада 110 муң ажыг кижи хууда кабинеттерде коштунган.
Россияның федералдыг үндүрүг албан чериниң Тыва Республикада эргелелиниң дыңнатканы-биле алырга, республиканың үндүрүг төлекчилери өнчү-хөреңги үндүрүглериниң эрткен чылдарда өрезин июльда төлеп ап болур.
ТР-ниң Чазаа июль айда хуу кижилерден өре чыыр шалыпчы айны эрттирер деп шитпирлээн.
А. МОНГУШ.
“Шын” №51 2024 чылдың июль 10