Хамаатыларның хууда өнчү-хөреңгизи дээш үндүрүг сөөлгү 10 чылдарның дургузунда бир-ле дугаар 2024 чылда 100 хуу чыгдынганын Федералдыг үндүрүг албанының республикада эргелелиниң удуртукчузу Алдын-Херел Кара-Сал Тыва Республиканың Чазааның ээлчеглиг Аппарат хуралының үезинде дыңнаткан.
Ооң мурнунда үеде үндүрүгнүң бо хевириниң чыылдазы чылдың-на 83–95 хуу турган.
2024 чылда хууда өнчү-хөреңги дээш үндүрүг чыылдазының ниити түңү 329,2 сая рубль болган. 2025 чылдың январь бирге чедир бо көргүзүг 329,7 сая рубль чедир өскен. Үндүрүг чыылдазының көвүдээни үндүрүг албанының ажылдакчыларының кызымак ажылының болгаш күрүнениң мурнунга хүлээлгелерин күүседиринге хамаатыларының харыысалгазының шыңгыыранының түңнели.
Эрзин, Бай-Тайга болгаш Чаа-Хөл кожууннарның бюджет албан черлериниң ажылдакчылары эң хөй үндүрүглерни төлээн. Хууда өнчү-хөреңги дээш үндүрүг өрезиниң ниити хемчээлин Федералдыг үндүрүг албанының республикада эргелелиниң ажылдакчылары сайгарган. 2025 чылдың эгезинде ооң түңү 184 сая рубль болган. Ол дээрге эрткен чылдыынга деңнээрге, 21,9 сая рубль эвээш. Бо сан-чурагайлар үндүрүглер төлээри көвүдээнин болгаш өрелерниң эвээжээнин херечилеп турар.
Боттарының үндүрүглериниң дугайында медээлерни хамаатылар “Госуслуги” порталда хууда кабинединден азы үндүрүг органнарынга боттары келгеш, билип ап болур.
Ш. ЛОПСАН белеткээн.
Чурукту интернет четкизинден хоолгалаан.
“Шын” №2 2025 чылдың январь 23