Ноябрь 1-де 55-ки аңгы гвардейжи мото-адыгжы (даг) бригаданың тургустунганындан бээр он чылын демдеглеп турар. Дээди кол командылакчының чарлыы-биле Россияның эң бедик дайынчы шаңналдарының бирээзи – Кутузов ордени-биле шериг кезээн шаңнаан. Күрүнени камгалаар дайынчы операцияларга, террорга удур болгаш амыр-тайбыңны кадагалаар операцияларга шылгараан шериг кезектеринге болгаш салбырларынга ону тыпсыр. Дайзынның күжү артык-даа болза, салдынган даалганы күүседип, дайынчы операцияларны билдинип организастап, күүсеткени дээш шаңналды тыпсып турар.
Бо хүннерде Тываның Баштыңы Владислав Ховалыг тускай шериг операциязының зоназынче Тывадан ээлчеглиг гуманитарлыг чүъктү чедирип чорааш, юбилейи база бедик шаңналы дээш шериг албанныгларга байырны чедирген. «Бо шаңнал чүгле аңгы-аңгы дайнычыларның эвес, а силерниң бүгү кезээңерниң маадырлыг чоруу деп санаттынып турарын бадыткап турар» - деп, Тываның Баштыңы социал четкилерде блогунда бижээн.
Владислав Ховалыг 55-ки бригаданың дайынчылары болгаш командирлери Ада-чурттуң Улуг дайынының үезинде немец-фашистерге удур өгбелериниң тулчуп чорааны дег амгы үеде база эрес-дидим тулчуп турарын демдеглээн. «Силерниң ажылыңар берге, тура-сорукту болгаш эрес-дидим чорукту негеп турар. Ынчалза-даа ол бистиң чуртувустуң келир үезинге чугула. Хүн бүрүде дайынчы базымнар, эжелеп алган бедиктер, камгалаттынган туруш бүрүзү – Тиилелгеже базым-дыр» — деп, Владислав Ховалыг бижээн. Республика бодунуң дайынчыларынга чоргаарланып, оларны бедии-биле үнелеп, оларны деткиир дээш бүгү-ле күжениишкиннерни үндүрүп турарын демдеглээн: тускай шериг операциязының киржикчилериниң өг-бүлелеринге дузалап, дайынчыларга херек немелде дериг-херекселдерни болгаш гуманитарлыг дузаны чыып чорудуп турар.
Владислав Ховалыг Россияның Айыыл чок чорук чөвүлелиниң секретары Сергей Шойгунуң эгелээшкини-биле тургустунган аныяк шериг кезээниң дайынчыларының эрес-дидим чоруу база командирлерниң билдилиг башкарылгазы чурттуң Чепсектиг күштеринде төлептиг черни ээлеп турарын, оларның чедиишкиннерин Россияның Президентизи демдеглеп чоруурун чоргаарланып бижээн байыр чедириишкинин дайынчыларга дамчыткан.
Кызылга бригаданың юбилейин демдеглээн байырлыг хемчеглер болуп эрткен. Эртенги шакта шериг кезээниң парад шөлүнге хууда состав чыскаалып, Россия Федерациязының болгаш Тыва Республиканың күрүне туктарын көдүрген. Ооң соонда шериг кезээниң девискээринде «Дириглерге – хүндүткел болгаш алдар! Мөчээннерге – мөңге сактыышкын!» деп тураскаалды база дайынчы алдар өрээлин байырлыг байдалда ажыткан.
Бригада командириниң шериг-патриотчу ажыл талазы-биле оралакчызы чораан подполковник Сүрен Бадының өөнүң ишти, бо чылдың сентябрьда авиаозал-ондаанга амы-тынындан чарылган республикада билдингир болчукчу Диана Бады тускай шериг операциязының маадырларынга мөгейиг кылдыр бо тураскаалды тудар саналды киирген турган. Чечен дайынының хоочуну, амгы үеде 55-ки бригаданың шериг албан хаакчызы, ТШО киржикчизи ефрейтор Александр Дупчур скульптураны кылган.
Бөгүн Улусчу чогаадылга бажыңынга юбилейлиг хүнге тураскааткан байырлал концерти болуп эрткен. Улусчу чогаадылга бажыңының шөлүнге хову кухнязы ажылдап, шериг оркестриниң хөгжүмчүлери аалчыларны уткаан. Ийиги каътта чурукчу Дмитрий Клавсуцтуң чураан тускай шериг операциязының киржикчилериниң портреттериниң делгелгезин салган.
Байырлыг хемчег үезинде бригаданың элээн каш дайынчыларынга Тываның Баштыңының күрүне шаңналдарын болгаш мактал бижиктерин тывыскан.
Гвардияның улуг прапорщиги Эрес Аракчаа, гвардияның улуг сержантызы Аяс Монгуш, гвардияның улуг прапорщиги Байлак Ондар шериг хүлээлгезин күүседиринге эрес-дидим, коргуш чок болгаш бодун хайыравас чоруу дээш, Тываның Баштыңының Өөрүп четтириишкинин чарлаан.
Гвардияның лейтенантызы Ирина Будникке, гвардияның прапорщиги Ирина Луценкога, гвардияның улуг сержантызы Любовь Соломеинага албан хүлээлгезин төлептиг күүсеткени дээш, Тываның Баштыңының Өөрүп четтириишкинин тывыскан.
ТР-ниң Чазааның парлалга албаны.
