Өгге семинар
Эрткен неделяда Каа-Хем кожууннуң Бүрен-Хем школазынга кожууннуң тыва дыл башкыларының семинары болган. Школаның шаңналга алган маңган ак өөнге башкылар аяк шайын ишпишаан, аңгы-аңгы темаларга илеткелдерни кылып, мастер-класстарны эрттирген. Чаа өөредилге чылының эгезинде арга-дуржулгазын солчуп, онза бодалдары-биле үлежири башкылаашкын ажылынга чогаадыкчы чорукту күштелдирер.
Кожууннуң төп эмнелгези 90 харлаан
Каа-Хем кожууннуң төп эмнелгезиниң 90 чыл оюн байырлыг байдалга октябрь 10-да демдеглеп эрттирген. Аңаа ТР-ниң Дээди Хуралының депутаттары Начын Чамбалдоо, Долаан Калбак, кадык камгалал сайыдының оралакчызы Чейнеш Саая болгаш өске-даа албан черлериниң, кожууннарның төп эмнелгелериниң улуг эмчилери киришкен. Ажыл-ижинге шылгарааннарны шаңнап-мактаан. РФ-тиң Кадык камгалал яамызының Хүндүлел бижии-биле травматолог эмчи Вадим Иргит-оол шаңнаткан. ТР-ниң Кадык камгалал яамызының «Хүндүлүг дагдыныкчы» деп хөрек демдектерин Родина Хертекке, Валентина Ооржакка, Татьяна Вяткинага тывыскан. Дээди Хуралдың хүндүлел бижиктеринге Сырын Биче-оол, Виктория Дабакай, Надежда Куржепей, Аяс Мамышев, Аяна Орустук, Наталья Шимит төлептиг болганнар. Күрүне Думазының депутады Айдың Сарыгларның өөрүп четтириишкин бижиктерин хөй чылдарда кадык камгалал адырынга ак сеткилдиг ажылы дээш Вадим Иргит-оолга, Татьяна Козловскаяга, Лариса Кууларга, Надежда Лукинага, Елизавета Монгушка, Айсана Монгушка тывыскан.
Орук тудуу эгелээн
Чөөн-Хемчик кожууннуң Шеми сумузунче кирер орукту асфальтылаар ажыл эгелей берген. Шемижилерниң үрде манаан күзели боттанып эгелээни өөрүнчүг. Акшаландырыышкынның шаа-биле бо чылын 2 километр орукту кылыр, артканын келир чылын уламчылаар деп кожууннуң чагырга даргазы Айдыс Куулар дыңнаткан. Орук-биле деңге айыылдыг байдалды тургузуп турар көвүрүгнүң септелгези база эгелей берген.
Наадым тиилекчилериниң найыры
Сүт-Хөлге бо чылдың республика Наадымының тиилекчилери болган чаңгыс чер чурттугларының хей-аъдын улам көдүрери-биле республика чергелиг эр кижиниң үш адаан найырын эрттирген. Хемчегге «Наадым–2025» хүреш маргылдаазының 18 харга чедир мөгелер аразынга шүүлген мөгевис Тыва Республиканың элээди Арзылаң мөгези Насык-Доржу Субудайга «Лада Гранта» машинаны, Наадымның аът чарыжының тиилекчилери Эрес Кара-Сал биле Андрей Хертекке аът сөөртүр тергелерни, Наадымның тыва ча адар оюнунуң баг адар хевириниң тиилекчилери Ринчен Ондар, Сылдыс Ооржак, Кежик Ондар, Найыр Сарыглар база Маны Кызылга уксаалыг богбаларны, тыва хүреш маргылдаазынга тулган тиилекчи болган «Кожуун чергелиг Чаан мөге» Түметей Ширижикке уксаалыг богбаны белектер кылдыр тывыскан.
"Таңдым байлаа" байырлал
Тараалаң бай Таңды кожуун Көдээ ажыл-агый ажылдакчыларының хүнүн «Таңдым байлаа» деп кожуун чергелиг байырлал кылдыр калбаа-биле демдеглеп эрттирген. Чаңчыл болган көдээ ишчилерниң парады, күскү дүжүт делгелге-ярмарказы, спортчу хемчеглерден аът чарыжы, хүреш болгаш янзы-бүрү солун мөөрейлерни эрттирген. Таңды кожууннуң көдээ ажыл-агый болгаш болбаазырадыр бүдүрүлге ажылдакчыларының I съездизи база болган. Аңаа көдээ ажыл-агый бүдүрүкчүлеринге субсидиялар болгаш грантылар, бараан маркетингизи болгаш рыноктуң сайзыралы, агроүлетпүр комплекизинге кадрлар белеткели, суму бүрүзүнге огород ажыл-агыйының хөгжүлдези болгаш аңаа хамаарыштыр тускай мергежилдерни чедип алыры деп айтырыгларны чугаалашкан.
Аржаанчылар оруун аштаан
Бии-Хем кожууннуң Аржаан сумузунуң культура ажылдакчылары сумунуң Аныяктар чөвүлели-биле катай Туран–Аржаан автооруктуң кыдыында девискээрин аштап-арыглаан. Төрээн чериниң бойдузунга кам чок, орук ажылдакчыларының ажылын үнелевес кижилерниң орук дургаар октапкан богун шоодайларга чыггаш, суурнуң бок төгер черинче чедирип, чонун арыг-силиг болурунче кыйгырган.
Юбилейин эрттирген
Доора-Хем суурнуң «Ромашка» уруглар сады 65 чыл болган байырлалын демдеглеп эрттирген. Байырлалга эрге-чагырганың бүгү адырлары идепкейлиг киржип, байырын чедирип, күш-ажылга шылгарааннарны шаңнап-мактаан.
/ Медээлер болгаш чуруктарны кожууннарның социал четкиде арыннарындан алган.
“Шын” №40 2025 чылдың октябрь 16