Тываның Баштыңы Владислав Ховалыг «Росатом Энергосбыт» АН-ның удуртулгазы-биле ажылчын ужуражылганы эрттирген. Ийи тала кады ажылдаарының аргаларын сайгарган. Компанияның удуртукчузу Алексей Горчаковтуң дыңнатканы-биле алырга, амгы үеде чугула санал-оналдарны ажылдап кылыры-биле, информацияны чыып турар.
Кызылдың Арбат шөлүнге Наркотиктиг бүдүмелдерни ажыглаарынга болгаш хоойлуга удур садып-саарарынга удур бүгү-делегей хүнүнге тураскааткан хемчегни Республиканың хөй-ниитиниң кадыкшылы болгаш эмчи профилактиказының төвүнүң ажылдакчылары эрттирген. Акцияның киржикчилери болгаш сонуургаан кижилер кадыкшылын халас хынадып, чигир болгаш холестеринин тодарадып, кадыкшылын кадагалаарының талазы-биле эмчилерниң сүмезин алган.
Япон режиссёр Акира Куросаваның Оскар шаңналын алган “Дерсу Узала” деп кинозу чырыкче үнгенинден бээр 50 чыл болган. Ада-чурттуң алдын фондузунче кирген кинону юбилейлиг чылда катап база телеканалдарда көргүзе берген.
2023 чылда Тываның төвүнге, Максим Монгужуковичиниң төрээн Национал театрының дужунга, Дерсу Узаланың тураскаалын салган. Чаа тураскаал Орус география төвүнүң ниитилелиниң болгаш М. Греков аттыг Шериг чурукчулар студиязының ачызында тыптып келген. Тыва театрның үндезилекчилериниң бирээзи, бистиң төөгүлүг актёрувустуң овур-хевирин болгаш төөгүзүн кадагалап арттырып бергени дээш улуу-биле өөрүп четтирер-дир бис.
Июнь 28-те, Аныяктар хүнүнде, ТР-ниң Национал парыгынга “Билиг” ниитилели боттарының арга-дуржулгазы-биле үлежип, лекцияларны болгаш мастер-класстарны эрттирген. Илья Кудрин “Дипфейктер болгаш кылымал угаан амгы үениң кол кибер-айыылы” деп темага илеткелди кылган. Психолог Ульяна Монгуш “Мергежил шилип алырының психологтуг аргалары” практиктиг кичээлди эрттирген. А.С. Пушкин аттыг Национал ном саңының культура-чырыдыышкынныг программалар болгаш төлевилелдер килдизиниң эргелекчизи Радмила Оюн хөй чон баарынга сөс алырының болгаш шынарлыг таныштырылга кылырының чажыттары-биле үлешкен. “Билиг” ниитилелиниң хемчеглери “Билип ал, ынак бол, чоргаарлан, көвүдет” деп улуг хемчээлдиг фестивальдың кезии болур.
Республиканың медицина колледжизиниң доозукчуларынга дипломнарны байырлыг байдалга тывыскан. Өөредилге чериниң 80 чыл юбилейинде 450 специалист доозуп турар. Оларның аразында 195 фельдшер, 195 эмчи сестразы, 30 фармацевт, 26 санитар фельдшер, 4 технолог-эстетист бар. 48 доозукчу кызыл диплом-биле дооскан. 25 кижи доозупкаш ажылдаар эмнелге чери-биле дугуржулгалыг өөренип дооскан. Оларның хөй кезии Сыстыг-Хемниң, Хүттүң, Торгалыгның, Суштуң болгаш өске-даа сумуларда кадык камгалалының бирги звенозунуң чаартылга программазы-биле туттунган чаа фельдшер-акушер пунктуларынга ажылдаар.
Чыжыргана СААЯ белеткээн.
Чуруктарны интернеттен хоолгалаан.
“Шын” №25 2025 чылдың июль 3
