Хакасия болгаш Тыва республикаларда Россияның Көдээ ажыл-агый хайгаараар эргелели эрге-чагырга органнары-биле Кызыл кожуунга командылал болгаш штаб өөредилгелерин эрттирген. Хемчегниң сорулгазы – чума болгаш оон-даа өске халдавырлыг онза айыылдыг аарыгларны болдурбазы.
Июль 6-да Чөөн-Хемчик кожууннуң Элдиг-Хемден дөрт километрде турар Эл-Бажы деп черге үш харлыг оол читкен. Дилээшкин ажылынче кожууннуң бүгү-ле албан черлериниң ажылдакчылары, волонтёрлар болгаш дилеп-тывар отрядтарның специалистери киришкен. Ниитизи-биле 150 хире кижини дилеп-тывар ажылга мөөңнээн. Түңнелинде бичии оолду июль 8-те даң бажында тып алганнар.
Эрткен дыштаныр хүннерде Чаа-Хөл кожуун «Наадым-2025» малчыннар байырлалын эрттирген. Байырлалды сумуларның чонунуң, малчыннарының, ажылчын коллективтериниң база мөгелериниң парады-биле эгелээн. Чаа-Хөлдүң Тыва эки турачылар аттыг стадионунга кожууннуң төлептиг көдээ ишчилеринге шаңналдарны тывыскан. Кожуун Наадымын «Авыда» мода болгаш костюм театрының көргүзүү болгаш үлегерлиг ыры-сам коллективтериниң концерти-биле дооскан.
Чурукту Чаа-Хөл кожуун чагыргазының социал четкиде арнындан алган.
Июль 7-де Тываның төлээлери Москвага Улусчу фронтунуң “Бүгү чүве Тиилелгеже!” деп шуулганынга киришкен. Аңаа бүгү чурттан 1000 ажыг идепкейжилер келген. Олар үш чылдың дургузунда чоруткан гуманитарлыг ажылын түңнээр база дайынчыларны деткиир чаа программаларны тургузар сорулгалыг чыылганнар.
Июль 7-де Тожу кожууннуң Ий суурнуң чурттакчылары "Арыг суур. Арыг эриктер" деп акцияга каттыжып, 250 ажыг хап бокту чыгганнар. Арыглаашкын соонда шупту бокту тускай бок төгер черже ыраткан.
Республиканың эрге-чагыргазы Наадымның чемпионнарын тодарадырының чурумун малчыннарның байырлалының бүдүүзүнде өскерткен. Тываның Чазаа аңаа хамаарышкан доктаалды хүлээп алган. Ол доктаал ёзугаар «Эң-не тергиин» деп атче кордакчы малчыннар «ВетИС» федералдыг информация системазының «Хорриот» электроннуг албан черинге малын бүрүткеткен турар ужурлуг.
Барнаулда «Аз. Арт. Сибирь – 2025» деп делгелгеде Тываның аныяк чурукчулары киржип турар. Делгелге июль 28-ке чедир ажылдаар. Сибирьден болгаш даштыкы чурттардан чурукчуларның 700 ажыг ажылдары бар. Тываны төлээлээн 10 чогаадыкчы аныяктар ажылдарын ында делгээн.
Олча СААЯ белеткээн.
Чуруктарны социал четкилерден хоолгалаан.
“Шын” №26 2025 чылдың июль 10
