Эрткен неделя онзагай болуушкуннар-биле байлак болган.
- Неделя Билиглер хүнү-биле эгелээн. Ол хүн республиканың аңгы-аңгы школаларынга 72 муң ажыг школачылар байырлыг чыскаалга киришкен.
- Дараазында эң-не онзагай болуушкун — РФ-тиң Президентизи Владимир Путинниң Тывага келгени. Президент найысылалда чаа ажыттынган школага ажык кичээл эрттиргеш, Чазак бажыңынга чөвүлел хуралга Тыва Республиканың социал-экономиктиг хөгжүлдезиниң хууда программазында чаартылгаларны, чаа сорулгаларны сайгарып чугаалашкан.
- Неделя дургузунда Тываның Баштыңы Владислав Ховалыг Улуг-Хем, Мөңгүн-Тайга база Таңды кожууннарга ажыл-агыйжы үнүүшкүннерни кылган.
- Шагаан-Арыг хоорайның ЧЭТ-ке чазын болган онза байдалдың уржуктарын чайладыр ажылдарның түңнелдерин хынап четкен. «ЧЭТ-тиң котельнаязы кышка белен» — деп, Владислав Ховалыг социал четкилерде дыңнаткан.
- Мөңгүн-Тайганың Мугур-Аксы биле Кызыл-Хая сумуларга Тываның Баштыңы Владислав Ховалыг биле Россияның алдарлыг экономизи Руслан Цаликов четкеш, тус черниң чурттакчылары-биле ужурашкан. Ужуражылга колдуунда оруктар болгаш электри энергия айтырыгларының дугайында болган.
- Тускай шериг операциязынче чорудар ээлчеглиг дуза чыылдазы эгелээн. Сентябрь төнчүзүнде гуманитарлыг чүъктү чорудары планда көрдүнген.
- Сентябрь 6-да Кызылдың Президентиниң кадет училищези 10 чылдаан юбилейин демдеглээн. Ук училищеде бо хүнде 400 хире оолдар, уруглар өөренип турар, оларның аразында ТШО киржикчилериниң ажы-төлү база бар.
- Неделяның төнчүзүнде республикага эрткен онзагай болуушкун — Тыва Республиканың Дээди Хуралының (парламентизиниң) дөрткү чыыжының депутаттарының соңгулдалары.
- Сентябрь 8-те республиканың чурттакчы чону ТР-ниң Дээди Хуралының база муниципалдыг деңнелдиң депутаттарын соңгаан. Соңгукчуларның бадылаашкыннарының түңнелдери: “Чаңгыс демниг Россия” партия дээш соңгукчуларның 80,01 хуузу бадылаан; Россия Федерациязының Коммунистиг партиязы дээш – 5,47 хуу; Россияның Либерал-демократтыг партиязы дээш – 5, 04 хуу; “Чаа кижилер” партия дээш – 5,41 хуу; “Чөптүг Россия – шын дээш» партия дээш – 3,29 хуу.
- Түңнелдер ёзугаар ТР-ниң Дээди Хуралының (парламентиниң) дөрткү чыыжынга 32 депутат соңгуттурган, республиканың чаңгыс аай соңгулда округундан 16, чаңгыс мандаттыг соңгулда округтарындан 16 депутат соңгуттурган.
- Тывада өртке удур онза чурумну сентябрь 10-дан 30-ге чедир узаткан.
- Бо неделяда Тываның Баштыңы Владислав Ховалыг Москвага ажыл-агыйжы сургакчылаашкында. Ол сургакчылаашкын үезинде РФ-тиң Чазак Даргазының оралакчызы Татьяна Голикова-биле ужурашкаш, Тывада элээн каш социал ужур-дузалыг объектилер тудуунга хамаарыштыр чугааны чоруткан. Ол ышкаш РФ-тиң тудуг болгаш коммунал ажыл-агый сайыды Ирек Файзуллин-биле ужуражылгазында чиигелделиг ипотека программазының хуусаазын регионга узадырының аргаларын сайгарып чугаалашкан.
