Красноярскиге болган экономика шуулганының түңнелиниң дугайында Тываның Чазак Даргазы Владислав Ховалыг бодунуң блогунда бижээн:
«Красноярск хоорайга экономика шуулганынга бистиң делегациявыс идекпейлиг киришкен. Ниитизи-биле 1,8 млрд рубльга дугуржулгаларга атты салдывыс. Сбербанк болгаш тускай тудуг кылыр «Трансстрой» башкарыкчы компания-биле кады элээн каш чылдар дургузунда боттандырар төлевилелдерни санаарга 18 млрд рубль. Бо талазы-биле Кызылдың бир микрорайонунда комплексилиг тудугнуң төлевилели эгелээн.
2023 чылдың КЭФ-ке бистиң регионнуң инвестициялар хаара тудуп алырынга эчис сорулгалыг тускай сессияны бир дугаар аңгы эрттирген. Тываның инвестициялар хаара тударының арга-дуржулгазын чогуур деңнелге үнелээн деп бүзүреп тур мен. Ол дугайын республиканың ажыл-херек харылзааларының делгемчип турар дугуржулгалары бадыткап турар. Тыва Чазактың командазынга, «Енисей Сибири» корпорациязынга, сессияны организастап эрттиргени дээш шуулганның оргкомитединге четтирдим!
Ажыктыг информация болгаш чугаа солчурунуң, дараазында базымнарны шүүштүрериниң талазы-биле шуулганны бедик деңнелге эрткен деп үнелээр-дир бис. Шак мындыг ужуражылгалар чүнү эки ажылдап турарывысты база кайда чедир ажылдаарывысты билип алырынга чугула херек. Дугуржулгаларга ат салганывыс ажыл-херектиң чүгле чартыы-дыр. Кыска үе дургузунда оларны боттандырарының картазын ажылдап кылгаш, бадылаар херек. Ук ажылды чогуур хыналдага ап, бердинген даалгаларның күүселдезиниң талазы-биле ниити координация ажылын Чазактың Аппарадынга дагзып тур мен».
