Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев «Динамо» деп Новосибирск область организациязынга 100 чыл болган ою-биле байырын чедирген. Байырлыг хемчег 2024 чылдың ноябрь 11-де болуп эрткен.
«Динамо» чурт-биле деңге хөгжүп, баштай тускай албан ажылдакчыларының кадыкшылга болгаш белеткел талазы-биле спортчу каттыжыышкыны кылдыр ажылдап эгелээнин Анатолий Серышев демдеглээн. Удаваанда аңаа аңгы-аңгы бүдүрүлгелерден ажылчын коллективтер катчып келген.
Ниитилелдиң киржикчилериниң 80 ажыг хуузу эки турачылар болуп, Ада-чурттуң Улуг дайынынче аъттангаш, Улуг Тиилелгеге үлүг-хуузун динаможулар кииргенин бүрүн эргелиг төлээ демдеглээн. “Ада-чурт камгалакчыларының спортчу арга-мергежилдери дузалаан” – деп айыткан.
Салгалдарның харылзаазын тудары чугула деп, А. Серышев бодалын илереткен. “Динамо” соон салгаар салгакчыларын белеткеп, хоочуннар арга-дуржулгазын аныяктарга дамчыдып, алдарлыг чаңгыс чер-чурттугларынга тураскааткан маргылдааларны доктаамал эрттирип турар.
Бүрүн эргелиг төлээ 100 чылдаан юбилейлиг хемчег үезинде, ниитилелдиң даргазы Сергей Сизовка “Хүндүлүг динаможу” демдекти база спорттуң хөгжүлдезинге киирген үлүг-хуузу дээш тренер Виктор Кузнецовка Өөрүп четтириишкинниң бижиин тывыскан.
«Динамо» ниитилели 1923 чылдың апрель 18-те үндезилеттинип тургустунган болза, Новосибирскиниң филиалы 1924 чылдың октябрь 25-те ажыттынган. Бөгүн ол чепсектиг күштерниң болгаш эрге-хоойлу камгалаар органнарның муң-муң спортчуларын каттыштырган.
Уруглар-биле спортчу хемчеглерни организастаары, шериг-патриотчу клубтар-биле кады ажылдажылга, амыдыралдың берге байдалынга таварышкан уругларны деткиири - ажылының кол угланыышкыны болуп чоруур. Спортчу секцияларда ийи муң ажыг уруглар хаара туттунган.
ТР-ниң Чазааның парлалга албаны.