Республиканың одаар чүүл шыгжамырларынче хөмүр-даш чедирилгези уламчылап, кышка белеткел чоруп турар. Амгы үеде республика девискээринде ниитизи-биле 39 хөмүр-даш складтары бар. Оларның 27-зинден хөмүрнү чонга садып эгелээн. Сентябрь 10-15-тен тура шупту 39 склад долузу-биле ажылдап кириптер.
Регионалдыг тариф албан чериниң дыңнатканы-биле алырга, «Чадаана» болгаш «Каа-Хем» хөмүр-даш уургайындан садар өртек 1 тоннада 2925,37 рубль, а кожууннарда хөмүр-даш складтарында өртектерни тускай доктаал ёзугаар турумчуткан.
Кызылда (уургайдан шыгжамырга чедирер база дүжүрери-биле кады) чонга хөмүрнү үүрмектеп садарының үстүкү өртээ – солагай талакы дачаларга чедир 1 тоннада 3508 рубль; оң талакы кезээнге чедир 1 тоннада 3715 рубль болурун Тарифтер албаны медеглээн.
Ак-Довурак хоорайда 1 тонна хөмүр-даштың өртээ: 4176 рубль, Кызыл кожууннуң Ыраккы Каа-Хем сумузунда 3338 рубль-биле Академик Обручев кудумчузунуң 35 дугаарлыг бажыңындан садып ап болур. Таңды кожуунда – 4205 рубль, Чаа-Хөлде – 3771 рубль, Сүт-Хөл кожуунда 3649 рубль, Эрзинде – 5514 рубль, Бии-Хемде – 4271 рубль, Мөңгүн-Тайгада – 6193 рубль, Тес-Хем кожуунда – 4986 рубль, Барыын-Хемчикте 1 тоннада 4092 рубль дээш кожуун бүрүзүнде хөмүр-даштың өртектери аңгы-аңгы. Сөөртүп чедирер техникага кудар кывар-чаар болгаш чедирген хөлезинин санаптарга ол хире болуп турар.
«Социал хөмүр» губернатор төлевилели чурттакчы чоннуң социал байдалы кошкак бөлүктеринге одаар чүүлдүң адрестиг дузазын көргүзер дээрзи билдингир.
Олча ОНДАР.
“Шын” №35 2005 чылдың сентябрь 11