ТР-ниң Күш-ажыл болгаш социал политика база Одаар чүүл болгаш энергетика яамылары Тываның Баштыңы В.Ховалыгның даалгазы-биле «Социал хөмүр-даш» губернатор төлевилелин боттандырып турар.
Хөй ажы-төлдүг болгаш амыдыралы чегей өг-бүлелерге Тываның Чазаа одаар чүүл-биле дузалап, "Социал хөмүр-даш" губернатор төлевилелин каш чыл бурунгаар эгелээн. Ук төлевилел регионнуң шупту кожууннарында чедиишкинниг боттанмышаан.
Бо хүннерде Каа-Хем кожуунда ук төлевилелдиң ажылы доозулган. Тус черниң 130 хөй ажы-төлдүг өг-бүлези ийи тонна одаар чүүлдү күрүнеден деткимчеге алган.
Кызыл хоорайда база Кызыл болгаш Барыын-Хемчик, Чөөн-Хемчик кожууннарда төлевилелдиң ажылы уламчылап турар. Октябрь 15-те социал хөмүр-даш алыр даңзыда ады кирген 29 өвүржүге одаар чүүлдү чедирип эгелээн. Өске кожууннарже социал хөмүр-дашты октябрь төнчүзүнге чедир чедирери планда көрдүнген. «Транспорттуг сервис болгаш төлевилелдер» республика бүдүрүлге чери хөмүр-даш чедирер ажылды хүлээнген дээрзин сагындыраал.
Социал хөмүр-даш губернатор төлевилелин 2024–2025 одалга сезонунда 2856 хөй ажы-төлдүг өг-бүле алыр. Тываның Чазааның үре-түңнелиг ажылының ачызында регионнуң муң-муң чурттакчызы өг-бүлезиниң бюджедин камнап алыр-дыр.
Дараазында одалга сезонунда "Социал хөмүр-даш" төлевилелиниң деткимчезин алыры-биле билдириишкинни тус черниң чагыргазында социал адырга киирер. Билдириишкин киирген хамааты бүрүзү социал деткимчени албас. Тускай комиссия хыналданы чоруткан соонда, социал хөмүр-даш алыр хамаатыларның даңзызынче кирер.
Бистиң корр.
«Шын» №79 2024 чылдың октябрь 16