Угаанныг кижиниң мелегей кижиден ылгалы
Бир катап өөреникчизи башкызынга чедип келген:
– Башкы, угаанныг кижиниң мелегей кижиден ылгалы чүдел? – деп айтырган.
Ол эртен кончуг эки аяс хүн турган. Башкы таваар шайын аартавышаан, мөңге чүүлдер дугайында ханы боданып олурган. Өөреникчизиниң салган айтырыынга харыы бээр дээш, чедир ишпээн шайлыг аяан салып кааш, өөреникчизин эдерткеш, чорупкан. Ол ону чоокта чаа буступ калган даг ийинге эккелген. Ында төктүп баткан көшке даштарны өөреникчизинге көргүскеш:
– Бо даштарның шуптузун дедир даг кырынче үндүрүп көрем – дээн.
Даштарның хөйү-даа кончуг болган. Өөреникчи оларны хүнзедир даг кырынче үндүр дажып-ла турган. Башкызын көөрге, дүште-даа чок ыяш хөлегезинде мерген угаанныг кижиниң бижээн номунда оң, солагай холдарның часкаашкынының ылгалының дугайында чүүлдү сонуургап номчуп олурар болган.
Өөреникчи шаан төндүр даштарны дажыза-дажыза, хүн ашкалакта төндүрүпкен. Башкызының даалгазын кылып шыдапканынга чоргаарланып, ооң чанынга дидим базып келгеш, айтырган:
– Башкы, ам айтырыымга харыыны дыңнап болур мен бе?
Башкызы дүште-даа чок: “Чок. Ам-даа белен эвес-тир сен” – деп харыылаан.
Өөреникчизи шала удурланы аарак:
– Ынчаарга бо хөй дашты даг кырынче чүге дажыттырдыңар?
– Ол-дур! – дээш, Башкы айтыр салаазын бедик көдүргеш:
– Угаанныг кижи турган болза, бо хөй дашты дажыыр бетинде, дораан айтырар турган – дээш, өөреникчизи чүвениң утказын билген боор дээн идегел-биле олче көрүп турган.
«Шын» №76 2023 чылдың октябрь 7