Омск «Россияның аныяктар төвү – 2025» атты чаалап алган. «Россия» национал төпке Аныяктар херектериниң талазы-биле федералдыг агентилелдиң “Время молодых” аныяктар чедиишкиннериниң Бүгү-российжи премиязын тыпсыр езулалда ооң дугайында чарлаан.
Сибирьниң хоорайы ол хүндүлүг эрге-байдалды Пермь-биле үлешкен. Конкурстуң түңнел кезээнче Томск, Новый Уренгой база Хабаровск хоорайлар эрткен турган. Декабрьның 1-ден 20-ге чедир Күрүнениң ачы-дуза порталынга ажык бадылаашкынга эң хөй үннү алгаш, ийи тиилекчи тодараттынган. Сибирьниң чурттакчылары боттарының кордакчыларын идепкейлиг деткип, хөй үннү бергеннер. Омск биле Томск аразында шилилгени кылыры ындыг амыр эвес болган, чүге дизе бо ийи хоорай аныяктар болгаш студентилер төвү болуп турар.
Сибирь округунда РФ-тиң Президентизиниң бүрүн эргелиг төлээзи Анатолий Серышев округтуң регионнарынга аныяктар хемчеглерин эрттирери чугула деп чаңгыс эвес катап демдеглээн. «Аныяктар төвү – 2025» деп ат Омскыже база бүгү Сибирьже улуг төлевилелдерни киирип, идепкейжи аныяк кижилерге чаа аргаларны тургузар. Тываның Баштыңы Владислав Ховалыг сибирьжилерни деткип, Омск дээш соңгуурунче республиканың чонун кыйгарган турган.
Сибирьниң болгаш чурттуң өске регионнарындан 325 муң ажыг кижи Омск хоорайны деткип, сибирьжилерниң чаңгыс демниин көргүскенин А. Серышев демдеглээн. Пермь-биле чижилге улуг болган, чүге дизе Приволжье округтуң чурттакчы чонунуң саны база регионнары Сибирьниинден каш катап хөй. Ындыг болзажок, регионнар удуртукчуларының, Сибирь болгаш бистиң улуг чуртувустуң өске-даа девискээрлер чурттакчыларының кады ажылдажылгазы, тура-соруу болгаш тиилелгеже чүткүлү кайгыкчык түңнелдери көргүскен.
«Сибирьде РФ-тиң Президентизиниң бүрүн эргелиг төлээзи Анатолий Анатольевич Серышевке улуу-биле четтирдивис, ол, шынап-ла, бүдүн округту мөөңнепкен. Биске база берге болган, Сибирьден 2 хоорай бар: Омск биле Томск, ынчангаш бо чылын Омскыны деткээш, дараазында Томск дээш соңгуур деп дугурушкан бис» – деп, регионнуң Баштыңы бадылаашкынның түңнелин чарлаптарга, демдеглээн.
Бүгү-россияның аныяктар чедиишкиннериниң «Время молодых» премияның тускай номинациязын 2022 чылда доктааткан. Тиилекчи хоорайлар аныяктарның төлевилелдеринге деткимчени ап, Россияның аняыктарын хаара тудар төптер апаар. Мооң мурнунда Аныяктар найысылалы эрге-байдалды Нижний Новгород (2023), Москва база Владивосток (2024) хоорайлар алган турган.
