Сураглыг йогин Нагарджуна Индияга кылаштап чорааш, бир дагның эдээнге чурттап чораан чаржынчыг ядыы-түреңги чонга таварышкан. Үргүлчү хилинчек-човулаң көрүп чоруурундан ол чоннуң улузу аразында үзүк-соксаал чок алгыжып бактажыр, кажан-даа бот-боттарынга дузалашпас турган. Нагарджунага ол чон кээргенчиг болган, ынчангаш оларны эгээртинмес байлак өнчү-хөреңгилиг бай чон болдуруп каар-дыр, бо хая-даштыг дагны чыжыр алдын кылдыр хуулдуруптар-дыр деп шиитпирлээн. Ынчалзажок ооң мурнунга хенертен Мерген-Угаанның Бойду-Садызы Манчы-Шири көстүп келген-дир.
— Ол улуска хөй алдын бээрин күзеп турар-дыр сен — деп, Мерген-Угаанның Бойду-Садызы Нагарджунага чугаалап-тыр. — Ынчалдыр олар аас-кежиктиг болу бээрлер бе?
Ооң орнунга оларга буянныг ак үүле дугайында Өөредигни дамчыдып бер:
1) Буддага сүзүк-бүзүрелдиг чоруңар;
2) ада-иеңерни хүндүлеп чоруңар;
3) сеткил-сагыжыңар арыг тудуңар;
4) улугларны хүндүлеп чоруңар;
5) чалыыларга үлегер болуңар;
6) ядыыларга дузалажып чоруңар;
7) хөйнүң чурумун сагып чоруңар;
8) өскүс болгаш аарыг-аржык кижилерге өмек-дөмек болуңар;
9) мугулай угаанныг, билиг чок кижилерге Өөредигниң эге билиин тайылбырлап чоруңар;
10) бо Өөредигни чүс-чүс чылдарда сагып чурттаңар! Оларның амыдыралы канчаар өскерли бээрин бодуң көрүп каар сен!
Нагарджуна шак ынчаар кылган-даа. Ол чоннуң амыдырал-чуртталгазы чоорту экижип олурган. Улустар бот-боттарын хүндүлежип, аразында адаан-өжээнин соксаткан. Олар ам мал-маган тудуп, тараа-быдаа тарып амыдырай бергеннер. Аас-кежиктиг келир чуртталга дугайында күзелдер оларның чүректерин чүглей берген.
В.С. САЛЧАК очулдурган.
«Сарыг шажынның угаадыглыг чугаалары» деп номдан алган.
“Шын” №26 2025 чылдың июль 10