Федералдыг казна албан чериниң Тыва Республикада эргелели тускай шериг операциязы эгелээнден бээр гуманитарлыг дуза кадар ажылдарны тура дүшпейн организастаан.
РФ-тиң Тыва Республикада казна албан чериниң удуртукчузу Солаңгы Сааяның чугаалааны-биле алырга, «Бүгү чүүлдү тиилелгеже!» деп Улусчу фронтунуң эгелээни федералдыг акцияга ооң коллективи идепкейлии-биле киржип турар. «ТШО-да киржип турар чаңгыс чер чурттугларывыстың чугаазы-биле алырга, бистиң чорудуп турарывыс мотоциклдер аай-дедир аргыжарынга, аъш-чем болгаш эм-дом дажыглаарынга эргежок чугула техника болуп турар. Бо удаада он бир дугаар гуманитарлыг дузаны чорудуп турарывыс бо» – деп, Солаңгы Саая чугаалады.
Саима Далчин, Россияның улусчу фронтузунуң регионда күүсекчи комитединиң даргазы:
– Бөгүн бис казна албан чери-биле кады 55-ки гвардейжи мото-адыгжы бригадага гуманитарлыг дузаламчыны дамчыдып турарывыс бо. РФ-тиң Тыва Республикада казна албан чери Улусчу фронт-биле сырый харылзаалыг ажылдап, «Бүгү чүүлдү тиилелгеже» деп бүгү Россия чергелиг акцияда идепкейлиг киржип турар. Олар квартал санында Тыва Республикада улусчу фронтунуң салбырының агар санынче дузаламчыны удаа-дараа чорудуп турар.
«55-ки гвардейжи мото- адыгжы бригаданың 2 дугаар батальонунуң 6 дугаар ротазы гуманитарлыг дузаны хүлээп турарывыс бо. ТШО-да чаңгыс чер чурттугларывыска бүгү республиканың чону сеткилинден дузалажып турары чоргааранчыг-дыр. Батальоннуң өмүнээзинден чонувуска өөрүп четтиргенивисти илередип тур бис. Тиилелге бистии болур!» – деп, гвардейжи бригаданың төлээзи Азият Күжүгет чугаалаан.
«ТШО-да киржип турар чаңгыс чер чурттугларывыска гуманитарлыг дузаламчыны удаа-дараа чедирип турар бис. Бо удаада 3 мотоциклди 491 муң рубльге саттывыс. ТШО-да киржип турар чаңгыс чер чурттугларывыстың чагыын күүседип турарывыс бо. Оон аңгыда, коллективтиң демнежип тургаш даарааны 10 четкини чорудуп тур бис.
Гуманитарлыг дуза чорудар санында-ла, ажы-төлүвүстүң солдаттарга чылыг-чымчак сөстерин, сагыш-сеткилин илередип чураан чуруктарын суп каап турар бис» – деп, РФ-тиң федералдыг казна албан чериниң Тыва Республика талазы-биле эргелелиниң аныяктар эвилелиниң даргазы Ай-Хаан Куулар тайылбырлады.
ТР-ниң казна албан черинде профэвилел комитеди ажылдап турар. Гуманитарлыг дуза чедирер акша-төгерикти профэвилелдиң акшазы-биле садып турар дээрзин сагындыраал.
Бо чыл төнмээнде база катап ТШО-да чаңгыс чер чурттугларынче гуманитарлыг дуза чорударын республиканың казна албан чериниң коллективи планнап турар.
Тускай шериг операциязында киржип турар дайынчыларга ачы-дуза чыыр пунктулар дараазында адресте ажылдап турар: Кызыл хоорай, Тыва эки турачылар кудумчузу, бажың 3, каб 3, харылзажыр телефон: 8 (39422) 2-10-50; Кызыл партизаннар кудумчузу, бажың 30, каб 106.
Айдың ОНДАР.
Буян ООРЖАКТЫҢ тырттырган чуруу
«Шын» №40 2024 чылдың июнь 1
