Федералдыг казна албан чериниң Тыва Республикада эргелели тускай шериг операциязы эгелээнден бээр гуманитарлыг дуза кадар ажылдарны тура дүшпейн организастаан.
РФ-тиң Тыва Республикада казна албан чериниң удуртукчузу Солаңгы Сааяның чугаалааны-биле алырга, «Бүгү чүүлдү тиилелгеже!» деп Улусчу фронтунуң эгелээни федералдыг акцияга ооң коллективи идепкейлии-биле киржип турар. «ТШО-да киржип турар чаңгыс чер чурттугларывыстың чугаазы-биле алырга, бистиң чорудуп турарывыс мотоциклдер аай-дедир аргыжарынга, аъш-чем болгаш эм-дом дажыглаарынга эргежок чугула техника болуп турар. Бо удаада он бир дугаар гуманитарлыг дузаны чорудуп турарывыс бо» – деп, Солаңгы Саая чугаалады.
Саима Далчин, Россияның улусчу фронтузунуң регионда күүсекчи комитединиң даргазы:
– Бөгүн бис казна албан чери-биле кады 55-ки гвардейжи мото-адыгжы бригадага гуманитарлыг дузаламчыны дамчыдып турарывыс бо. РФ-тиң Тыва Республикада казна албан чери Улусчу фронт-биле сырый харылзаалыг ажылдап, «Бүгү чүүлдү тиилелгеже» деп бүгү Россия чергелиг акцияда идепкейлиг киржип турар. Олар квартал санында Тыва Республикада улусчу фронтунуң салбырының агар санынче дузаламчыны удаа-дараа чорудуп турар.
«55-ки гвардейжи мото- адыгжы бригаданың 2 дугаар батальонунуң 6 дугаар ротазы гуманитарлыг дузаны хүлээп турарывыс бо. ТШО-да чаңгыс чер чурттугларывыска бүгү республиканың чону сеткилинден дузалажып турары чоргааранчыг-дыр. Батальоннуң өмүнээзинден чонувуска өөрүп четтиргенивисти илередип тур бис. Тиилелге бистии болур!» – деп, гвардейжи бригаданың төлээзи Азият Күжүгет чугаалаан.
«ТШО-да киржип турар чаңгыс чер чурттугларывыска гуманитарлыг дузаламчыны удаа-дараа чедирип турар бис. Бо удаада 3 мотоциклди 491 муң рубльге саттывыс. ТШО-да киржип турар чаңгыс чер чурттугларывыстың чагыын күүседип турарывыс бо. Оон аңгыда, коллективтиң демнежип тургаш даарааны 10 четкини чорудуп тур бис.
Гуманитарлыг дуза чорудар санында-ла, ажы-төлүвүстүң солдаттарга чылыг-чымчак сөстерин, сагыш-сеткилин илередип чураан чуруктарын суп каап турар бис» – деп, РФ-тиң федералдыг казна албан чериниң Тыва Республика талазы-биле эргелелиниң аныяктар эвилелиниң даргазы Ай-Хаан Куулар тайылбырлады.
ТР-ниң казна албан черинде профэвилел комитеди ажылдап турар. Гуманитарлыг дуза чедирер акша-төгерикти профэвилелдиң акшазы-биле садып турар дээрзин сагындыраал.
Бо чыл төнмээнде база катап ТШО-да чаңгыс чер чурттугларынче гуманитарлыг дуза чорударын республиканың казна албан чериниң коллективи планнап турар.
Тускай шериг операциязында киржип турар дайынчыларга ачы-дуза чыыр пунктулар дараазында адресте ажылдап турар: Кызыл хоорай, Тыва эки турачылар кудумчузу, бажың 3, каб 3, харылзажыр телефон: 8 (39422) 2-10-50; Кызыл партизаннар кудумчузу, бажың 30, каб 106.
Айдың ОНДАР.
Буян ООРЖАКТЫҢ тырттырган чуруу
«Шын» №40 2024 чылдың июнь 1
![](https://sun9-21.userapi.com/impg/TmnpJM397QiHb8ZrO4w4bkW5T564e0SoT9Hm7w/xlaI_GzH_i8.jpg?size=807x677&quality=95&sign=13bd8963481363009ace8e08c09da8ef&c_uniq_tag=VWAkC_44oEOQyJTh953fYVEt7sxJyaipyLWSkOT0RbQ&type=album)
![](https://sun9-69.userapi.com/impg/fwFV-Yu2rG5RO3EQT8R1I-ocLwsGJVew-XJxhw/8QTjqd44E8M.jpg?size=807x537&quality=95&sign=992828bf958e50fec733bf419f0a3aec&c_uniq_tag=qeD_Jpyhuh5pGrKdwZ1MEoi6O9ZmWpSDCIaVGWegxCY&type=album)
![](https://sun9-23.userapi.com/impg/6FzduhMnV7FmjZf7cegv9mm8mD-PfZnu-isV6A/8FV5-Wn6MEE.jpg?size=858x935&quality=95&sign=94303340fbcc03e35b1cbaefbcae2fbc&c_uniq_tag=Ug5JVHnXeC051Dwm6sxDPLYSXPR4odx8yHwzPopXKPU&type=album)
![](https://sun9-60.userapi.com/impg/QESA0CYxoZlywRFmtB11TOvNsYFWNrcpL7otFw/WBRZgBVHxCA.jpg?size=931x935&quality=95&sign=d2a3998c95d02baf02f36fe7a2a4d629&c_uniq_tag=KK8bNZ-Sm8aK33yipF-appOhB-gu5Sm6ziIptrs93_E&type=album)
![](https://sun9-16.userapi.com/impg/tVwUnN5h50r2UDuPySmLt6JD0FLc-NdeYGn20A/JJXKHmseIRc.jpg?size=807x552&quality=95&sign=245c6b424aac6ec67ad49f113a6a0140&c_uniq_tag=HcWUhs5-6FPiydQAymwMIwExUgk0d1_qU8o427K8Hd8&type=album)
![](https://sun9-41.userapi.com/impg/cfcJOTzgJxF83P4KKICaDRF4j8S0olAHDMunPA/JFsc5SGsoHc.jpg?size=807x692&quality=95&sign=7b14e4d1b8ea7c7914e6cbdcf73d5477&c_uniq_tag=04jKtqipnWBrg0kwrxtXGUTtMUCwZChmbiVGcExNnYE&type=album)
![](https://sun9-43.userapi.com/impg/q04SI9S_0iMLeQ0KaOXjvhrqNRI8-bZpc52YXg/z1kPFY0_qZ4.jpg?size=807x463&quality=95&sign=2fbd489dba3cb9a84dda38d6ef085adf&c_uniq_tag=fMWKkGHFgkPaPCHJNQ7PNH91kBIv5pj4sn_gSI75gkM&type=album)