Республиканың сес улуг эмнелге черлериниң автопарыгы чаа транспортту алган. Чөөн-Хемчик база Улуг-Хем кожууннар аразының медицина төптери, Каа-Хем, Тес-Хем, Эрзин, Бай-Тайга, Сүт-Хөл болгаш Кызыл кожууннар төп эмнелгелериниң кол эмчилери байырлыг байдалда автомашиналарны хүлээп алган.
Тываның Чазааның Даргазының оралакчызы Елена Хардикова, регионнуң кадык камгалал сайыды Анатолий Югай эмнелгелерниң кол эмчилеринге автомашиналарның дүлгүүрлерин тудускан. Республика Баштыңының адындан байырны чедирбишаан, “Кадык камгалалы” национал төлевилелдиң “Кадык камгалалының бирги звенозун эде чаартыры” регион программазы-биле Тывага транспорт аймаа келгенин Е. Хардикова сагындырган. Чаа техника чаңгыс эвес кижилерге эмчи дузазын көргүзер боор деп, ол чугаалаан.
Ниитизи-биле 12 млн рубльге сес “УАЗ” база ийи “Лада Гранта” автомобильдерни аарыг кижилерге эмчи дузазын дүрген чедирери-биле саткан.
“Кадык камгалалы” национал төлевилелдиң бирги звенону эде чаартыр программазының регионга күүселдези-биле 2021 чылда 19 автомобильди 18,9 млн рубльга сатканын сагындыраал.
/ Бистиң корр.
