Чоокта чаа Эрзин кожууннуң Мөрен сумузунуң көдээ клувунга «Он чыл болдувус!» деп дыка солун концерт болган. Ол дээрге бистиң кожууннуң Надежда аттыг хоочуннар ансамблиниң юбилейлиг концерти-дир. Бо ансамбль чүгле Эрзин кожуунда эвес, республикада ады билдингир улусчу коллектив-дир.
Тургустунгаш 10 чыл болган бо коллективтиң чедиишкиннери хөй, чижээ, V Делегей чергелиг «Тургенев чайы» фестиваль-мөөрейниң Гран-при шаңналының эдилекчилери, «Алтын Майдан» делегей чергелиг национал культуралар фестивалының лауреаттары, «Көк аржыылчыгаш» республика фестивалының тиилекчилери дээш оон-даа өске.
Ансамбльдиң киржикчилери эмчилер, башкылар, удуртукчулар дээш колдуу шупту кожуунга ажылдап чораан күш-ажылдың хоочуннары. Оларның удуртукчузу Эрзин кожууннуң баштыңы Игорь Кыргысович Ламажап.
Мөренчилер хоочуннарның концертин улуг сонуургал-биле көрдүвүс. Юбилейлиг концертинге шыырак-ла белеткенген чорду, идик-хевиниң чаражын, ыр-шоору, танцы-самы көрүштүг болду.
Идепкейлиг хоочуннар
Көрүп чоруурга, хоочуннар дег идепкейлиг улус чок боор-дур. Мөренниң хоочуннары дыка талантылыг база хөй-ниитижи, идепкейлиг. Сумуда эртип турар шупту хемчеглери хоочуннар чокка эртпес. Хоочуннарның аразында ырлаар-самнаар, спортчу дээш кандыг-даа кижи бар. Оларның бирээзи Светлана Ырбыевна Доктаалайны демдеглекседим. Ол ырлаар салым-чаяанныг база хөй-ниитиниң ажылдарынга үргүлчү киржип чоруур хоочун. Ол ышкаш дыка хөй чылдар ишти клуб директорлап чораан Соскалмаа Самбуевна Баанай база кандыг-даа ажылдан чыда калбас, эрес-кежээ кижилерниң бирээзи. Ооң уруу авазының изин изеп, амгы үеде клуб директорлап турар. Уруу Чаймаа Баанай ажылында чедиишкинниг ажылдап чоруур. Чаймаа Чамзыевнаны авазы ышкаш эвилең-ээлдек, уран- талантылыг удуртукчу деп санаар бис.
/ Чечекмаа САДИ, ТР-ниң алдарлыг ажылдакчызы.
Чурукту интернеттен хоолгалаан.
“Шын” №45 2025 чылдың ноябрь 20
