Кызылдан он үш өскүс уруглар чаагайжыттынган бажыңнарны алганнар. Тываның өөредилге сайыдының хүлээлгезин күүседип турар Орлан Соян квартираларның дүлгүүрлерин чаа чурттакчыларга байырлыг байдалга тывыскан.
Ол квартиралар 2014 чылдан бээр Донбасска украин нацистер-биле тулчуп турар тоолчургу «Спарта» разведка батальонунуң командири Владимир Жоганың ады-биле адаан кудумчуда хөй аалдыг чаа бажыңнарда. Чаа бажыңның чурттакчылары, тускай шериг операциязының ийи киржикчизи – Айдаш Тумакай болгаш Айдың Ооржак Жога ышкаш Россияның чаа регионнарын хостаарынга база үлүг-хуузун кииргеннер.
«Өскүс болгаш ада-иезиниң хайгааралы чок арткан уругларга социал деткимчениң немелде магадылалдарының дугайында» хоойлу ёзугаар өскүс уругларга халас чурттаар оран-саваны берип турарын сагындыраалыңар. Республика 2025 чылда 75 өскүс уругларга чурттаар оран-сава тударынга 300 сая ажыг рубльди тускайлаан. Өскүстер бөлүүнге хамааржыр ам-даа 55 хамааты чурттаар оран-сава садып алырынга азы ипотека төлевирин төлээринге чуртталга сертификаттарын алыр.
Өскүс уруглар чаа квартираларын алгаш, беш чыл хуусаалыг социал хөлезилел керээзин чарар — өскүс уругларның социализациязынга ол хире үе херек. Бир эвес ол үе дургузунда кижи бот-тускайлаң амыдыралга чаңчыгып, күрүне хайгааралы чокка башкарлып шыдаар болза, чурттаар оран-сава оларның өнчүзүнче шилчиир.
2024 чылда Тывада 84 өскүс уруглар чуртталга байдалын экижиткен. Бо чылын 130 уруг, азы 1,5 катап хөй өскүстер квартираларын алыр.