Тускай шериг операциязынче гуманитарлыг дуза чорудар ажылдар уламчылавышаан. Февраль 20 үезинде, Шагаа байырлалын уткуштур, тускай шериг операциязында киржип турар чаңгыс чер чурттугларывысче чорудар чүъкке ааржы, курут, саржаг, чөкпек дээн ышкаш сүттен кылган ак чемни, далган-тарааны болгаш эът аймаан кожууннарның төлээлери найысылалче чүдүрүп эккеп турар.
Февраль 11-де ыраккы Мөңгүн-Тайга, Бай-Тайга, Барыын-Хемчик кожууннар баш удур тургускан график езугаар гуманитарлыг дузаны сөөртүп эккелген.
Мөңгүн-Тайга кожууннуң чүъгүн ук кожууннуң чагырыкчызы Эртине Успун болгаш Россияның көдээ ажыл-агыйының алдарлыг ажылдакчызы Өшкү-Саар Ооржак олар үдеп келген. Мөңгүн-Тайга кожууннуң чагырга даргазы Эртине Успуннуң медеглээни-биле алырга, 1557 килограмм хайындырган болгаш ыштаан аът, сарлык, хой эъди, 179 кил тырткан эът, «Мөген-Бүрен» КХН-ниң бүдүргени 500 банка тушёнка, «холодец» болгаш ааржы, курут дээн ышкаш ак чемни эккелген.
«Малчыннарның дөгерген малының куйгазын өрттеткеш, «холодец» кылдыр кылгаш, эккелдивис. Дайынчы бүрүзүнге ыштаан аът эъди, бир холодец, бир быжырган хой эъди, дээш шуптузун аңгылап хаптап каан. Тыртып белеткээн чиг мөң эътти савалаан. Кижи бүрүзүнге бир литр савазында эът онаажыр. Кызыл-Хая сумузунуң чурттакчы чонунуң чыгганы тырткан эъдин база эккелдивис. Эвээш-биче-даа болза, акша-төгерикти база чыгдывыс.
Көдээде чурттап чоруур малчыннарга акша айтырыы берге-даа болза, Россияның Президентизи Владимир Путинни деткип, төрээн черивисти дайзыннардан камгалап турар дайынчыларывыска дузаламчыны чорудуп турары бо. Ажы-төлүн, алган эжин чидиргеш, ыглаан-сыктаан чонумну көөрүмге, берге-дир. Моон соңгаар чонувус карааның чажыт төкпезин, дайын тиилелгелиг төнер болзун дээш, Шагаа уткуштур, Мөңгүн-Тайга кожууннуң өмүнээзинден чоруткан сүүзүннүг аъш-чемивис дайынчыларывыска тура-сорукту, күштү бээр болзун! Ында дириг арткан оолдарывыс кара бажын хары черге салбазын, өске черге ханын төкпезин! Онча-менди чанып келзин деп йөрээвишаан, чүъгүвүстү аъткарып тур бис!» – деп, Россияның көдээ ажыл-агыйының алдарлыг ажылдакчызы Өшкү-Саар Ооржак йөрээди.
«Шагаа уткуштур дайынчыларывыска эът аймаан хөйү-биле чедирер деп планнап турар бис. Кожууннардан гуманитарлыг дузаны чыып эгелей бердивис. Февраль 18-ке чедир хүлээр бис. Февраль 27-де, Шагаа бетинде аъш-чемивис дайынчы хөделиишкиннер девискээринге чеде берген турар ужурлуг» – деп, Улусчу фронтунуң Тывада салбырының күүсекчи комитединиң удуртукчузу Саима Далчин чугаалады.
Гуманитарлыг дуза чыыр ажылдарга Кызылдың Н.Н.Макаренко аттыг 15 дугаар лицейи база киришкен. «Идикке салыр кидис оъттар, уктар, соок үндүрбес чылыг хептер болгаш хол хаптары эккелдивис. Оон ыңай школаның волонтёржу отряды парафинден лааларны күзелдии-биле кылган. Школаның администрациязы 20 килограмм парафинни садып берген. Ниитизи-биле бүдүн школаның чыгган дузаламчызын эккелдивис» – деп, ук школаның башкызы Ирина Дударева тайылбырлады.
Шагаа байырлалын уткуштур чорудар гуманитарлыг дузаны Кызыл хоорайның Тыва эки турачылар кудумчузунуң 3 дугаар бажыңынга болгаш Цеченлинг хүрээзинде чыып турар. Гуманитарлыг дуза эккээрде, харыысалгалыг организакчылар-биле чүү чугула херек дээрзин айтырып, сүмелешкеш, үстүнде айыткан адрестерге эккээрин дыңнатты.
Харылзажыр дугаар: 2-10-50.
Айдың ОНДАР.
Буян ООРЖАКТЫҢ тырттырган чуруктары.
“Шын” №5 2025 чылдың февраль 13
