Онча-менди чанып келзиннер!

Тываның профэвилелдери деткип тур.

Тывада Профэвилелдер федерациязының даргазы, Тываның алдарлыг артизи Галина Сюрюн:
- Ниити чуртта болуп турар долу эвес мобилизацияга таваржып турар болгаш тускай шериг операциязында киржип турар шериглерни деткиири-биле Тываның профэвилелдери демнежип алгаш, Бүгү-россияның Улусчу фронтузунуң чарлааны “Шупту чүвени тиилелгеге!” деп акцияга киржип, акша чыылдазын база чорудуп тур бис.
Оон аңгыда, Тывадан ында киржип чеде берген оолдарывыска дуза болзун дээш, дайынчыларга таарыштыр чыып белеткээн тускай аптечкаларны Москвадан чагыткаш, белеткеп алган бис. Ону чүге ынчаар белеткээн дээрге, херек кырында ында байдалды кежинге көрген, Украинадан чоокта чаа чедип келген шериг оглувус Кылаң-оол Коңгар-биле ужурашкаш, кандыг дуза хереглеттинип турарын айтырган бис. Ооң чугаазындан 30-40 кижиге четчи бээр, эң-не чугула эмнер, болгаш балыгланы берген таварылгада, бирги эмчи дузазын чедиреринге херек чүүлдер чугула деп билип алгаш, ындыг херек чүүлдерлиг аптечкаларны Тывадан барган шериглерже чорудар бис.
Кажан-даа, каяа-даа, кандыг-даа кижиниң эң-не үнелиг чүүлү - кадыкшыл болгай. Ылаңгыя айыыл бо, чанында чоруп турар байдалда, бистиң оолдарга дуза болзун! Шупту онча-менди чанып кээрин күзеп тур бис! Тыва эр кижиниң адын сыкпайн, тура–соруктуг шериг хүлээлгезин күүседип турар оолдарывыска мөгейип, чоргаарланып, шыдаар шаавыс-биле бүгү талазы-биле дузалажырын шупту кызыдаалыңар.
Тывавыстың эрес-дидим оолдары онча-менди чанып келзиннер!
Делегейге ТАЙБЫҢ делгерезин!