Арга-арыг өрттериниң ужун Тывада онза байдал чурумун чарлаан. Ындыг шиитпирни республиканың Баштыңы Владислав Ховалыг сөөлгү каш хонуктарның оперативтиг байдалын адырлар аайы-биле яамыларның удуртукчулары, кожууннарның чагырга даргалары-биле сайгарып чугаалашканының соонда, хүлээп алган.
Республиканың девискээринге изиг агаар июньнуң баштайгы чартыында тургустунган. "Эрге-чагыргаларның чарлааны өртке удур онза чуруму, арга-арыгже баарын шеглээни кижиниң буруузу-биле болуп турар өрттерниң санын эвээжетсежок, кургаг чаңныктарның, күштүг хаттарның ужун ында-мында от халавы бо-ла болуп турар.
Хамааты камгалалының болгаш онза байдалдар албанының дыңнадыы-биле алырга, бистиинде амгы үеде 23 арга-арыг өртү хөрлээлеп турар. 1700 хире гектарның черин от алган. Өрттерниң тайга-таскыл черлерде болуп турары, олар-биле демиселди нарыыдадып турар.
Өрт халавы-биле 220 ажыг кижи демисежип турар. Удавас оларга Забайкалье крайда өрттер өжүрүлдезинден дедир кыйгырткан бистиң 30 авиадесантнигивис немежир. Оон аңгыда, Сибирь регионнарының чамдык удуртукчуларындан Тываже өртчүлерни сургакчыладырын дилээн бис» — деп, бодунуң ук шиитпирин Владислав Ховалыг тайылбырлаан.
“Бодап турганывыс ышкаш, эрткен чаъстар арга-арыг өрттери-биле байдалга огулуг салдар чедирип шыдаваан. Олар чамдык черлерни таварып эрткен. Кургаг чаңныктарның ужун байдал нарыыдап турар. Өрт-биле демиселге күштү мөөңнеп турар бис. Ооң өжүрүлдезинде хаара туттунган 261 кижиден аңгыда, кожууннарның арга-арыг даамылдарының курлавырында 45 кижи бар. Чаа чалбырааштар илереттингенде, оларны өжүрер ажылдарга курлавырда күштү шалыпкын хаара тудуп турар бис.
Тываның барыын талазында ужар чүүл хайгааралын күштелдирген. Агаар баксырааны-биле чөөн талаже ужудуушкуннар болдунмайн турар. Булуттар дүргээ тарай бээрге, ужар чүүл хайгааралын уламчылаар бис. Ынчан суглуг вертолётту калбаа-биле ажыглаар бис. Ындыг чүүл өрттер-биле демиселди улам үре-түңнелдиг болдурар” — деп, Тываның Баштыңы Владислав Ховалыг соцчеткиде бодунуң арынынга бижээн.
А. ХЕРТЕК.
Чурукту Федералдыг Авиаарга-арыг камгалалындан алган.
“Шын” №49 2024 чылдың июль 3
![](https://shyn.ru/media/cache/2024/07/04/t69jbrenhlc-ba0d1d327d.jpg)