Тываның Баштыңы Владислав Ховалыг Тываның арга-арыг девискээрлеринде онза байдал чурумун соксаткан дугайында чарлаан.
Өрт айыылы улгадырга, 2024 чылдың август 4-те Тываның девискээринде арга-арыгларга регионалдыг деңнелдиг онза байдал чурумун регионнуң удуртукчузу киирген турган. Ол хүн республиканың 23 аңгы-аңгы черлери өрттенип турган. Арга-арыг өрттерин өжүрер дугайында ОБЯ-га онааган.
Арга-арыг өрттерин өжүрери-биле Забайкалье, Бурят, Хакас республикалардан, Красноярск крайдан авиа арга-арыг камгалал албаннарындан 76 камгалакчыны чалап эккелген. Онза байдалды чарлаан үеден эгелээш, хып турган өрттерниң 17-зин неделя дургузунда төндүр өжүрүшкеннер.
Тываның Баштыңы дилегге харыылаан коллегалары – регион удуртукчуларынга болгаш өртчүлерниң боттарынга өөрүп четтиргенин илереткен. Келген специалистер бөгүнде элээн нарын байдалдыг Таңды биле Чеди-Хөл кожууннарда өрттерни өжүржүп турар. Арга-дуржулгалыг специалистерниң мергежээн ажылы болгаш сөөлгү хонукта чаапкан чаашкын байдалды чавырылдырыптар дээрзин Владислав Ховалыг демдеглээн.
Регионалдыг диспетчер албанының медээзи-биле алырга, август 12-де Тываның Каа-Хем, Таңды, Чеди-Хөл база Улуг-Хем кожууннарда арга-арыг фондузунуң черлеринде ниитизи-биле 2343,70 га шөлдүг 14 арга-арыг өрттенип турар. Кызыл биле Таңдының арга-арыг ажыл-агыйларында 528,50 га шөлде 2 өрттү өжүрген. Эрткен хүнде Тожу биле Туранның арга-арыг ажыл-агыйларында 3 өрттү өжүрген.
Арга-арыг өрттерин өжүреринге 216 кижи болгаш 18 техника хаара туттунган.
Республикага 30 градус чедир изиирин, чер-черлерге хаттың күжү секундада 17–22 метр чедип, чаңныктап, долу дүжери чадавас дээрзин метеорологтар дыңнаткан. Бай-Тайга, Каа-Хем база Эрзин кожууннарның девискээринде өрт айыылы улуг дээрзин сагындыраал.
ТР-ниң Парлалга албанының медээзинден алган.
"Шын" №61 2024 чылдың август 14
