Шагаан-Арыг биле Таӊдыныӊ арга-арыг ажыл-агыйларыныӊ девискээринде улуг өрттерни өжүрген. Республиканыӊ арга-эзимнеринде байдалдыӊ турумчуй бергени-биле холбаштыр, арга-арыг фондузунуӊ черлеринге хамаарыштыр чарлаан «Онза байдалдар» чурумун июнь 29-та соксаткан.
Ынчалза-даа республиканыӊ бүгү девискээринде өртке удур онза чурум ам-даа хевээр. Өрт айыылын болдурбазы-биле хоруп каан хемчеглерни, ооӊ иштинде арга-арыг кирип, одагаланып болбазын сагыыр.
«Онза байдалдар» чурумун «Азас» болгаш «Убсунур ыйгылаажы» федералдыг заповедниктерниӊ, республиканыӊ онза камгалалдыг черлериниӊ девискээринге өрттер өөскүй бээрге, чарлаан.
Амгы үеде байдал анаа, турумчуй берген дээрзин регионалдыг диспетчер албаны дыӊнадып турар. Республиканыӊ девискээринде ниитизи-биле 39,5 га шөлде ам-даа дөрт өрт хып турар. Авиа өртчүлерни болгаш арга-арыгныӊ өрт албаныныӊ ажылдакчыларын өрттер өжүреринче хаара туткан.
Эрткен чылын арга-арыг өрттери кижилерниӊ от-биле серемчилел чок болганындан өөскүп үнген болза, бо сезонда өрттер чаӊныктан хып үнген дээрзин специалистер чугаалап турар.
2023 чылда өрт айыылыныӊ сезонунуӊ эгелээнинден тура республиканыӊ девискээринге 65 арга-арыг өрттерин бүрүткээн. Эрткен чылдыӊ бо үези-биле деӊнээрге, оон чүгле 12 чүүл эвээш болган.
Тыва Республиканыӊ Чазааныӊ медээзи-биле Р.Демчик белеткээн.