Тываның Баштыңының Дээди Хуралга Айыткалын «Шын» солундан номчааш, сөөлгү үш чылда дыка-ла хөй ажылдар кылдынганын таныштывыс. Каракка көзүлдүр-ле экижээн-дир. Социал тудуглар: школалар, уруглар садтары, чуртталга бажыңнары база кожуун, суурларда ФАП-тар, көдээ клубтар хөйү-биле немежип, чаарттынып турары чонга эптиг байдалды тургускан. Чоннуң социал байдалы экижээн, өртектерни өйлеп турары, бети дизе, хөмүр өртээ. Республика Чазааның Аппарат удуртукчузунга чоннуң санал-оналын өөренип көөрүн дааскан болгай. Медицина сайзырап, эмчилер чоннуң кадыы дээш шыңгыыраткан чурум-биле ажылдап турары эки-дир.
? Кызыл хоорайның Вавилин ээтпээнде, даг талазында, бажыңнар чырык чок, улус караңгы оранда чурттап турар. Бо сайзыраңгай үеде канчап караңгыга чурттаарыл? Кызыл хоорайның мэри бо талазы-биле чүнү планнап турарыл? Чоокку чылдарда аңаа чагылар тургузуп, чырык кожары болдунар бе? Чон түреп турар.
? Тываның Чазааның деткимчези-биле октаттынган «Чедер» курортун ажылдадып эгелезе-даа, инвалид, кадыы кызыгаарлыг чонга эжиктерин ажытпайн турары хомуданчыг. «Чедер» курорттуң удуртулгазы Социал фонд-биле тускай керээни чарбааны-биле инвалидтерге путёвкалар бербейн турар. Ийи-үш чыл дургузунда путёвка оочурлаар дээш, шылай бердивис. Назы-харывыс дөгүп, "кызыл хүннээн" улус ол узун путёвка оочурун манап четтигер бис бе? Совет үеде кадыывыс баксырадыр күрүнеге ажылдап чораан бис. Ынчангаш мону Чазактан дилеп олур бис. Биске, инвалидтерге, дузалажырын манап артывыс.
Раиса МОНГУШ.
Кызыл хоорай.
Редакциядан:
Номчукчунуң бир дугаар айтырыынга Кызыл хоорайның мэриязының специализиниң харыызы:
— Найысылалдың девискээринде хуу бажыңга электри коштурар талазы-биле айтырыгны Кызыл хоорай мэриязының Архитектура, чер болгаш эт-хөреңги талазы-биле департаментизинден (ДАГИЗО) билип ап болур. Ооң адрези:
Кызыл хоорай, Бухтуев кудумчузу, бажың 3.
Харылзажыр телефоннар: +7 (39422) 2-19-37, +7 (923) 265-77-87.
Инвалидтерге болгаш кадыы кызыгаарлыг кижилерге «Чедер» санаторий-курортка эмненип, дыштаныр путёвкалар дугайында авторнуң айтырыынга харыылап бээри-биле Россияның Социал фондузунуң Тывада салбырындан база ТР-ниң Күш-ажыл болгаш социал политика яамызындан дилээн бис. Ук албан черлериниң специалистери «Чедер» санаторий-курорт күрүнеге хамаарышпас, хуу кадыкшылга чери болганда, ооң удуртулгазындан айтырар деп харыы берген.
«Чедер» санаторий-курорттуң путёвкалар тарадыр албанының ажылдакчызының харыызы:
— «Чедер» санаторий-курорт күрүнеге хамаарышпас, хуу албан чери. Чиигелделер ам бодунда чок, чүгле акциялар чарлап турар. Чижээ, бо чылдың февраль айда 60 хардан өрү назылыг кижилерге ачы-дуза акциязын чарлаан, путёвканың өртээ бир хонукта 5 муң рубль болза, 4 муңга чиигеткен.
“Шын” №12 2025 чылдың апрель 3