Тускай шериг операциязының хоочуну Иван Монгуш Тыва Республиканың ажыл-чорудулганың чамдык хевирлеринге лицензия бээр болгаш хайгаараар албанның удуртукчузунуң оралакчызы албан-дужаалда ажылдап эгелээн.
Иван Монгуш ийи дээди эртемниг: 2008 чылда Тываның күрүне университедин «Төөгү болгаш эрге-хоойлу» эртемин тергиин демдектерлиг дооскан, 2012 чылда Россияның эрге-хоойлу академиязынга «Юрист» мергежилди чедип алган.
Аңгы-аңгы күрүне албан черлеринге ажылдап чораан үелеринде улуг арга-дуржулганы алган. Тыва Республиканың Соңгулда комиссиязының эрге-хоойлу килдизиниң начальниги болуп ажылдаан, 2016 чылдан 2019 чылга чедир республиканың Соңгулда комиссиязының кежигүнү. ЧЭК-4 башкарыкчы компанияга айыыл чок чорук килдизинге ажылдап чораан.
2020 чылдан шериг керээзин чаргаш, ээп чанып келгижеге, Федералдыг казначействонуң Тыва Республикада эргелелиниң юридиктиг килдизинге ажылдаан. Тускай шериг операцияларының зоназынга «Ахматтың» составынга эки турачы болуп албанын эрттирген.
«Тываның маадырлары» кадрлар төлевилели-биле Иван Монгуш 600 ажыг кордакчылар аразындан шылгалдаларны болгаш чугаалажылганы чедиишкинниг эртип шилиттинген. Төлевилелдиң өөредилге кезээнде ол ажыл-чорудулганың чамдык хевирлерин лицензиялаар болгаш хайгаараар адырны шилип ап, организацияның удуртукчузу – дагдыныкчызы Эртине Намдандан улуг арга-сүмени алган.
Тываның Баштыңы Владислав Ховалыг «Тываның маадырлары» кадрлар төлевилелиниң баштайгы түңнелдерин дыңнадып тура, ТШО хоочунунуң удуртукчу болгаш хууда шынарларын бодунуң блогунда демдеглээн:
«Стажировка эгезинден-не команданың ажылынче идепкейлиг катчып, эрге-хоойлу камгалаар органнар-биле рейдилерже үнүп, хоойлуга чөрүштүр арага продукциязын садып-саарарынга удур демиселди деткип, ниитилелге бараан болурунга бердингенин болгаш беленин ол көргүскен. Ажылын чедимчелиг күүседиринге ооң дайынчы арга-дуржулгазы биле профессионал стажы дузалаар дээрзинге бүзүрээр мен" — деп, Республиканың Баштыңы демдеглээн.
Иван Монгуш республикада хоойлуга чөрүштүр чажыт арага садыглаашкынынга удур демиселди деткип, идепкейлиг ажылды чорудуп турар. Күрүне албаны чүгле ажылдаары эвес, а төрээн республиказының хөгжүлдезинге үлүг-хуузун киирер арга-дыр деп ол санап чоруур.
ТР-ниң Чазаның парлага албаны.
Чурукту ТР-ниң Чазааның социал четкиде арнындан алган.
«Шын» №39 2025 чылдың октябрь 9
