Федералдыг үндүрүг албанының Тыва Республикада эргелелиниң удуртукчузу Алдын-Херел Кара-Сал Ак-Довурак хоорайга болгаш Барыын-Хемчик кожуунга хууда хүлээп алыышкынны эрттирген.
Төптен келген удуртукчудан чурттакчыларның сонуургаан айтырыглары хөй болган. Чижээ, дайынчы хөделиишкиннер хоочуннарынга кандыг чиигелделер көрдүнгени, төлээр ужурлуг үндүрүг дадывырының дугайында дыңнадыышкыннар, 2026 чылда үндүрүг талазы-биле хоойлуда кандыг өскерилгелер кирип турарының дугайында чонга тайылбыр ажылын чорударының чугулазы.
Алдын-Херел Кара-Сал дайынчы хөделиишкиннерге киржип чораан хоочуннарга көрдүнген чиигелделер дугайында тодаргай тайылбырны берген. Бир эвес шак ындыг хоочуннарның автомашиназы 150 аът күштүг болза, чаңгыс транспорт дээш үндүрүг дадывырындан хостадып болур. Чиигелделер Россияның социал фондузунуң медээзи-биле билдириишкин чокка көрдүнүп каан болур. Бир эвес хамааты бир дугаар чиигелде алыр дээн болза, МФЦ-же азы үндүрүг инспекциязынче билдириишкинни киирер эргелиг.
Чоннуң дилеп турары семинарга хамаарыштыр чаа үнүп келир чылда үндүрүг хоойлузунда өскерилгелер дугайында республика чергелиг ийи дугаар үндүрүг шуулганын Кызылга 2025 чылдың декабрь 18-те Культура сайзыралының төвүнге эрттирерин эргелелдиң удуртукчузу дыңнаткан. Ол шуулганга үндүрүг хоойлузунда кирген өскерлиишкиннерни шуптузун тодаргай сайгарып чугаалажыр. Ылаңгыя кожууннарда үндүрүг албанының ажылдакчылары шуулгандан билип алган чүүлүн чонга кончуг таптыг тайылбырлап чедирери чугула дээрзин ол сагындырган.
Ажыл-агыйжы сургакчылаашкын үезинде Алдын-Херел Кара-Сал Ак-Довурак хоорайның болгаш Барыын-Хемчик кожууннуң саң-хөө эргелелдериниң удуртукчулары-биле ужурашкан. Аңаа тус чер бюджединиң үндүрүглерден кирип турар орулгазы болгаш бюджет организацияларының шимчевес өнчү дээш үндүрүг дадывырын канчаар төлээнин түңнеп чугаалашкан.
Бо хүннерде чыл түңнели-биле Барыын-Хемчик кожуунда үндүрүг хавырылдазы 81 хууга күүсеттинген, Ак-Довурак хоорай 80 хууга күүсеткен болуп турар.
Барыын-Хемчик кожууннуң бюджет албан черлериниң ажылдакчыларының чүгле 69 хуузу шимчевес өнчү дээш үндүрүг дадывырын төлеп алган болза, Ак-Довурак хоорайда оон эвээш – 54,4 хуу болуп турар. Ниитизи-биле регионнуң көргүзүглериниң ортумак деңнелинден эвээш болганын эргелелдиң удуртукчузу түңнеп чугаалаан.
Чурукту болгаш медээни Үндүрүг албанның ТР-де эргелилиниң социал четкиде арнындан алган.
“Шын” №48 2025 чылдың декабрь 11