Республиканың социал албан черлеринче регион болгаш муниципалитеттер чергелиг оруктар участоктарының септелгези доозулган. Бо чылда септелге ажылдарын “Айыыл чок шынарлыг оруктар” национал төлевилелдиң акша-хөреңгизи-биле чоруткан.
Таңды кожуунда Балгазын болгаш Бай-Хаак суурларда школаларже орук участоктарының ниити узун дурту дөрт километр. Ону септээр ажылдарны “Восток”, “ДСТ” болгаш “Суугу” кызыгаарлыг харыысалгалыг ниитилелдерниң ажылчыннары чоруткан. Кызылда 19 болгаш 20 дугаарлыг школаларже оруктарның агар септелгезин база кылган.
Оруктарны септээри нарын технологиялыг ажыл. Орук участогун безин септээрде, ооң чер иштинде таваа кылдыр сайлыг, элезинниг дашты төгери, ону тырылдыр аар техника-биле бастырары, ооң кырынга оруктуң чалын чадарда, адаанга суг, шык эрттирбес материалдарны чадары, оруктуң кырыкы чалын тырый бастырары, асфальтылаары дээш оон-даа өске технологтуг ажылдарны чорудар ужурлуг.
Социал албан черлеринче орук участоктарын септээринден аңгыда, машиналар тургузар шөлдерни база кылган. Чижээлээрге, Кызыл хоорайда Медицина колледжизи, халдавырлыг аарыглар эмнелгези биле терапевт салбырының чанында машиналар тургузар шөлдерни туткан.
Кызыл хоорайның төп девискээринде Чүлдүм, Гагарин болгаш Щетинкин-Кравченко кудумчуларның белдирлерин, олардан шөйлүп чоруткан орук участоктарын алгыткан. Ынчангаш Хан солуй кудар станцияның, Тываның күрүне филармониязының, хоорайның 1 дугаар поликлиниказының чоок-кавызынга машиналар шимчээшкининге, кижилерниң чадаг кылаштаарынга элээн эптиг апарган.
Кызыл хоорайның кудумчуларында чамдык орук участоктарын алгыдып септээнинден аңгыда, оруктарны дургаар камгалал шаараш херимнерни тудуп, оруктарга кайнаар шимчээриниң демдектерин чуруп, шимчээшкинни өйлээр светофорларны тургускан.
Тываның суурларында болгаш хоорайларында социал албан черлеринче орук участоктарын чаартып септээни автотранспорт болгаш чадаг кижилерниң шимчээшкининге айыыл чок чорукту улам магадылаан.
Бистиң корр.
«Шын» №84 2024 чылдың ноябрь 2
