Кызылдың Вавилин ээтпээниң чурттакчызы мен. Тываның аңгы-аңгы кожууннарының чону доозазы Кызыл хоорайже көжүп кирип эгелээнин билир бис. Көдээ суурларда ажыл чок чүвени кижи каяа ажылдап, ажы-төл азыраар боор, ындыг-ла ыйнаан. Бо черде көжүп келгеш, он ажыг чыл болуп тур мен. Хоорай-биле аргыжылга дыка багай турган. Сөөлгү үелерде автобустар саны көвүдээн, биеэгизинден черле чүгээртээн-дир. Ынчалза-даа кижи саны көвүдээрге, машиналар база көвүдээн. Орук кыдыында доктаамнарга автобус манаар бис. Оруктуң ол-бо талазынче кежери дыка берге. Бо улуг кижиге безин орук кежери коргунчуг, сүрээденчиг. Чаш ажы-төлге та кайы хире коргунчуг чүве. Чоокку үелерде безин чеже орук озал-ондаа болуп каапты. Чадаг кижи кежер черлер чок. Орукту кайыын кежери билдинмес. Машина оруунуң кыдыында чадаг кижи кылаштаар тротуарлар чок. Чадаг кижини үстүрүп кааптар азы бир болза бир-ле орук шимчээшкинин сагып чораан чолаачының кырынче халды бээр чолаачы аттыг кижилер көвүдээн-дир. Ажы-төлдү кудумчу үндүреринден безин кижи коргар. Оода-ла доктаамнар дужунга чадаг кижи кежер черлерден кылырын Кызыл хоорайның чагыргазындан дилеп тур бис.
Каш хонук бурунгаар база автобустан дүжүп келген 11 харлыг оолду эртип чыткан машина үстүрүпкен деп медээ интернет четкизинге тарап турду. Оруктарда им-демдек чогундан, харыысалга чок чолаачыларның хайындан чеже чаш ажы-төлүвүс хорап тур. Машина башкарар документизи чок хирезинде, руль артынга олурупкаш, кижилер амы-тынынга чедип чоруур маңгыстарга хамаарыштыр хоойлу-дүрүмнү шыңгыырадыр арга бар бе? ОШАЧКИ ажылдакчылары документ чок машина мунукчуларын чүге доктаадып, хынавайн турарыл? Бөдүүн чонга амыр-тайбың байдалдан тургузуп бээрин диледим.
Руслана КУУЛАР.
“Шын” №37 2025 чылдың сентябрь 25Оценил 81 человек