ССРЭ-ниң составынче ТАР-ның эки тура-биле каттыжып киргениниң 80 чылынга тураскааткан III регионнар аразының Орус культура фестивалы доозулган.
Орус культура фестивалының дээди шаңналын Красноярск крайдан «Ирбинушка» улустуң ыры ансамбли, ийи кижиниң күүселдезинден Лили биле Дана Ивановтар, чаңгыстың ырызында Дана Иванова тиилээн. Тыва биле Красноярск крайның чогаадыкчы коллективтер болгаш күүседикчилер аразынга шылгарап, тускай шаңналдарга төлептиг болганнар.
Солун концерт программазындан аңгыда, республиканың чурттакчылары болгаш аалчылары Кызыл хоорайның аныяктар сесерлиинге Орус культура фестивалының хөглээшкинниг кезээнге киришкен. Бөгүнгү байырлал Орус культураның хөй талалыын дамчыткан деп, аалчылар демдеглээн.
Аңгы-аңгы шөлдерге аргыттынарынга, чинчи-шуру өрүүрүнге, дойдан кылыглар кылырынга, ол ышкаш блины быжырарынга база лаалар болгаш дүрзүлер чогаадырынга мастер-класстар болган.
Республикада чоннарны төлээлээн арбаннар мөөрейлеринге чербижилер шылгарааш, тиилээн. Баба-Яга өрегези-биле Орус культура төвү ийиги база үшкү черлерни аразында үлешкен.
А.МОНГУШ.
"Шын" №62 2024 чылдың август 17
