Орус шеригниӊ төөгүзүнде кижи бүзүрээр аргажок маадырлыг тулчуушкуннарныӊ бирээзи чүс алдан чыл бурунгаар (эрги календарь-биле) 1864 чылдыӊ декабрь 4-те болган.
100 кижи 10000 дайзынга удур
1864 чылдыӊ ноябрь төнчүзүнде Коканд чурттуг мулла Алимкул 10 муӊ шерии-биле Ташкент хоорайдан үнгеш, Туркестанныӊ шивээзинче чорупкан. Оларныӊ сорулгазы Семиречьеде орус суурларже шавар халдаашкын кылыры турган.
Туркестанныӊ комендантызы ховуда бир-ле дээрбечи бөлүктер (ол дээрге кокандыларныӊ башкы хайгыылы-дыр) улчуп чоруп турар деп билип кааш, есаул Василий Серовтуӊ чүс урал казактарын хайгыылче чорудупкан.
Серовтуӊ командылаар отрядынга 2 офицер, 5 урядник, 98 казак турган, оон аӊгыда чүс шеригге 4 артиллеристи, фельдшерни, улаачыны, үш медээчи казахты база кожуп берген.
Туркестандан 25 километр ырак черде турар Икан суурну бир-ле отряд эжелеп алган дээрзин Серов оларга уткуштур келген кыргыстардан дыӊнаан.
Декабрь 4-те чүс шериг хайгыылче үнүпкен, казактар Икан чоогунга хенертен кокандыларныӊ кол күш шериинге таваржы берген.
Казактар чүгле арык турган черни эжелеп, тевелерниӊ чүъктерин союп, чепсектиг шоодайларын өпейтир чыып четтигипкен. Оларны бүзээлепкен болган.
Уралчыларныӊ аразынга арга-дуржулгалыг дайынчылар турган, олар Севастопольду камгалаарынга, Туркестанче баштайгы походтарга киржип турганнар.
Үш хүн дургузунда аъш-чем-даа чивээн, суг-даа ишпээн, урачылар долгандыр камгалалды тудуп турганнар. Он хире шавар халдаашкынны чылча шапкан. Алимкулдуӊ бодунуӊ мунуп чораан аъдын безин чыттыр шаапкан.
Мулла Алимкул Серовче чагаа чорудупкан:
«Дүжүп бер, бистиӊ чүдүлгевис хүлээп ал: кымны-даа хомудатпас мен!»
Саттыныкчы кижи тывылбаан. Декабрьныӊ 6-да эртенгиниӊ 7 шакта кокандыларныӊ шерии үш таладан халдап келген. Аштаанындан могап-шылаан, үш хонук удуваан, 4 улай келген шавар халдаашкынны чылча шаап турган казактар өлүг-диригниӊ аразында келген. Оон Серов уралчыларга дөрбелчин кылдыр чыскаалыпкаш, чүткүдүп үнер деп дужааган.
Какандылар могап-шылаан улусту чылча шаппышаан, шургуп келген. Казактарныӊ баштарын одуруп алгаш, чоруп турганнар.
Үш шак дургузунда казактар уш верстан эвээш черни эртип келген.
Олар чер кыры шара-хере турда, Туркестанныӊ комендантызыныӊ чоруткан отрядын көрүп кааннар. Алимкул ховуже чоруй барган.
Үш хүн үргүлчүлээн демиселдиӊ түӊнелинде иканныӊ чүс шерии бодунуӊ составыныӊ чартыындан хөй кижини ышкынган.
Казактарныӊ маадырлыг чоруун өөредилге номнарында сактып биживээн. Россияда Иканныӊ чүс шерииниӊ маадырлыг чоруунга тураскаал чок. Маадырлыг чорукка тураскаадып адаан кудумчу-даа чок.
Ындыг турбуже, шаптараазыннар турза-даа, маадырлыг чорук дугайында сактыышкын амдыгаа чедир дириг.
