Россияның Президентизи Владимир Путин 2023 чылды Башкының болгаш дагдыныкчының чылы кылдыр чарлаан турган. Чыл дургузунда Россияга булуң бүрүзүнге ук темага хамаарышкан янзы-бүрү хемчеглерни организастаан.
Республиканың Р.Д. Кенденбиль аттыг уран чүүл школазы Башкының болгаш дагдыныкчының чылы-биле чергелештир тургустунганындан бээр 45 чыл оюн чылды өттүр демдеглээн.
Чыл адакталган. Эрткен неделяда бүдүн чылдың түңнелдерин үндүрген байырлыг хемчег уран чүүл школазынга болган. Аңаа юбиляр школаның доозукчулары, алдар-аттыг культура ажылдакчылары болгаш культура адырының албан черлериниң удуртукчулары аалдап келген. Байырлыг хемчегни «Аялга» виолончелистер ансамбли Георгий Свиридовтуң «Тройка» деп композициязы-биле ажыткан.
Республиканың Р.Д. Кенденбиль аттыг уран чүүл школазының директору Николай Дамбаа сөс ап, байыр чедиргеш, ук школаның ажыл-чорудулгазын таныштырган. Бо чылын школаның талантылыг 197 өөреникчизи болгаш башкылары ниитизи-биле 18 Россия чергелиг чогаадыкчы мөөрейлерге, делгелгелерге киришкеш, шаңналдыг черлерни алган дээрзин ол демдеглээн.
Кандыг-даа байырлал шаңнал-мактал чок эртпес. Бо чылын 70 харлаан юбилейин демдеглеп турар уран чүүл школазының башкызы, күш-ажылдың хоочуну, чаңгыс эвес салгалдың алдар-аттыг культура ажылдакчыларын кижизиткен Вера Монгушовна Оюнга ТР-ниң Баштыңы Владислав Ховалыгның адындан байыр чедирген чагаазын болгаш ТР-ниң Дээди Хуралының Даргазы Каң-оол Давааның адындан өөрүп четтириишкинниң бижиктерин тывыскан.
«Тыва культуравысты бедидип, ажы-төлүвүстү уран чүүлге-даа, эртем-билигге-даа өөредип чорууруңар дээш четтирдивис. Уругларны уран чүүлге өөредип чоруур башкылар акша-төгерик дээш эвес, патриотчу сеткилдии-биле өөредип чоруур деп бодаар мен. Чоннуң культуразын бедидер дээш, тура дүшпейн тулчуп чорууруңарны үнелээр бис» – деп, ТР-ниң Дээди Хуралының өөредилге, культура, аныяктар болгаш спорт политиказының талазы-биле комитединиң даргазы Аяна Моңгуш чугаалааш, төлептиглерге шаңналдарны тывыскан. Хөй чылдарда үре-түңнелдиг ажылы дээш орус дыл болгаш литература башкызы Вера Монгушовна Оюнга, бухгалтер Татьяна Александровна Бобровага, кижизидикчи башкы Чечена Эрес-ооловна Долаанга өөрүп четтириишкин бижиктерин, школаның директору Николай Юрьевич Дамбаага, фортепиано башкызы Саида Сарыгларга хүндүлел бижиктерни тывыскан.
Кызыл хоорай чагыргазының төлээлери база мугур харлаан школаның доозукчузу, Кызылдың А.Б. Чыргал-оол аттыг уран чүүл колледжиниң директору Айлаңмаа Каң-оол коллективке байырын чедирип, чылыг-чымчак сөстерни илереткеннер.
Тыва Республиканың профэвилелдериниң даргазы Галина Сюрюн бодунуң ээлчээнде ук школада профэвилел даргазы Чечена Долаанны хөй чылдарда ак сеткилдиг, бердинген хөй-ниитижи ажылы дээш Хүндүлел бижик-биле шаңнаан.
Айдың ОНДАР.
Николай ИВАНОВТУҢ тырттырган чуруу.
“Шын” №95 2023 чылдың декабрь 13
