Июль 5-те Улусчу чогаадылга төвүнге Тываның улустуң чогаалчызы, шүлүкчү, прозаик болгаш журналист Кара-Күске Күнзекович Чоодунуң даргалаашкыны-биле «Кавай»/ «Өпей ыры” деп онлайн-мөөрейниң жюризиниң хуралы болуп эрткен. 15 чурттакчылыг черден 35 киржикчиниң мөөрейге киирген чогаалдарын жюри кежигүннери сайгарып көргеннер.
Тыва Республиканың алдарлыг ажылдакчызы, Улусчу чогаадылга төвүнүң оралакчы директору Урана Адыг-ооловна Намгай-оол, журналист, шүлүкчү, Россияның Чогаалчылар эвилелиниң кежигүнү Саяна Май-ооловна Өндүр болгаш шүлүкчү, Россияның Журналистер эвилелиниң баштаар чериниң кежигүнү Чечена Мандаңовна Монгуш составтыг жюри чогаалдарны үнелеп сайгарганнар. Мөңгүн-Тайга кожуундан эң хөй авторлар киришкенин олар демдеглээннер. Ооң соонда — Барыын-Хемчик кожуун. Ол ышкаш мөөрейге Кызыл, Тес-Хем, Улуг-Хем, Чөөн-Хемчик, Бай-Тайга, Каа-Хем, Бии-Хем, Сүт-Хөл, Таңды, Тожу, Чаа-Хөл, Чеди-Хөл кожууннарның болгаш Ак-Довурак биле Кызыл хоорайларның төлээлери киришкен.
Шүлүктерде чаа литературлуг көрүштү, чаа-чаа үзел-бодалдарны илереткенин жюри кежигүннери демдеглеп, моон соңгаар чогаалдарны авторлар боттары ыыткыр номчуурун саналдаан. А эң дээре деп санаткан чогаалдарны артистерге, ыраажыларга саналдап, сөөлүнде барып, өпей ыры кылдыр хуула берген шүлүктер чыындызын үндүрер деп турар.
«Кавай»/ «Өпей ыры” деп мөөрейниң төнчү түңнелин бөгүн, июль 8-те, үндүрер. Ону таныштыра бээр бис.
Бистиң корр.