2026 чылдан эгелеп Россияның Социал фондузунуң Тывада салбыры ажылдавайн турар улустуң пенсиязынга регионнуң социал немелдезин чурттаарының кудуку хемчээлинге чедир эде санааш, төлеп эгелээр. Бо хүннерде ажылды шуудадыры-биле тус чер чагыргаларының социал камгалал эргелелдери деткимчезин көргүзүп турар. Социал немелде төлевирлер чорудар хүлээлгени Россияның Социал фондузунуң регионнарда салбырларынче дамчыдып бергени социал дуза дугайында федералдыг хоойлуга киирген өскерилгелерни хүлээп алганы-биле холбашкан.
Чурттаарының кудуку хемчээли федералдыг деңнелден куду регионнарга социал немелде төлевирни Россияның Социал фондузу кылып турар. Пенсионерлерге хамаарыштыр чурттаарының кудуку хемчээли федералдыг деңнелден ажып турар субъектилерде немелде төлевирлерни тус черниң эрге-чагыргазы кылыр. Тывада регионнуң немелде төлевирин Күш-ажыл болгаш социал политика яамызы чорудуп турар. Ону Тываның 16 муң ажыг чурттакчызы ап турар. Чаа чылдан эгелеп ол төлевирлерни Социал фондунуң Тывада салбыры кылып эгелээр.
Ажылдавайн турар пенсионер кижиниң материалдыг хандырылгазының ниити түңүн санаарда, пенсиязын, немелде материалдыг хандырылгазын, ай санында акша төлевирлерин, ооң иштинче социал ачы-дуза база кирип турар болгаш оон-даа өске социал деткимчени көрүп турар. Бир эвес бо бүгүнүң шуптузун кадыптарга, ажылдавайн турар пенсионерниң ниити орулгазы регионда тургустунган чурттаарының кудуку хемчээлинге четпес болза, аңаа ол түңге чедир немелде төлевирни кылыр апаар. 2026 чылда Тывада пенсионер кижиниң чурттаарының кудуку хемчээли 16450 рубльге дең.
Социал фондунуң Тывада салбыры регионнуң социал немелде төлевирлерин билдириишкин чокка пенсия-биле деңге чорудар. Чүгле январь айда ийи аңгы кылдыр шилчидер, а февральдан эгелеп пенсионерлер хары угда ап эгелээр. Ол төлевир дээш пенсионерлер кандыг-даа билдириишкин биживес деп, Тывада Социал фонд салбырының башкарыкчызы Часкал Дараа тайылбырлап турар.
Социал немелде төлевирлер алыр эргелиг улусту Россияның социал фондузунуң Тывада салбыры боду информастыг системада медээлерге даянып тургаш тодарадыр. Пенсионерлер немей документилер дужаар дээш кылашташпас ужурлуг.
Күрүне деткимчези-биле холбашкан айтырыглар бар болза, Тываның чурттакчылары чаңгыс аай төптүң халас 8 800 100 0001 дугаарынче долгап болур. Регионалдыг шугум операторлары понедельниктен четверг хүннеринде 9.00 шактан 18.00 шакка чедир база пятницада 9.00 шактан 16.00 шакка чедир тайылбыр ажылын чорудуп турар.
Ай-кыс МОНГУШ, РСФ-тиң Тывада салбырының МИЧ болгаш хөй-ниити-биле харылзаа тудар бөлүүнүң удуртукчузу.
Чурукту интернеттен хоолгалаан.
“Шын” №50 2025 чылдың декабрь 25