Камчаткага чер шимчээшкининиң үезинде онкологтар бригадазының составынга кезиишкин чорудуп турган тыва эмчи Меңги Дадар-оол Пирогов ордениниң эдилекчизи болган. Айыылдыг байдалдарда эмчи дузазын көргүзеринге бедик профессионал болгаш коргуш чок чоруу дээш бедик күрүне шаңналынга төлептиг болган Тывада ийи дугаар эмчи ол.
Меңги Сылдысович Дадар-оол – салым-чаяанныг аныяк эмчи. Профессор В.Ф. Войно-Ясенецкий аттыг Красноярскының медицина университедин 2019 чылда, Сибирьниң күрүнениң медицина университедин 2021 чылда дооскан. «Эмнээшкин ажыл-херээ», «Хөрек хирургиязы» деп мергежилдерни чедип алган. 2020 чылда республиканың 1 дугаар эмнелгезиниң 4 дугаар пульмонология салбырынга эмчи брады болуп күш-ажылчы базымнарын эгелээн. Ооң соонда дөрт чыл хире республиканың онкология диспансериниң өкпе болгаш ижин-шөйүндү ыжыктарының салбырынга өкпе хирургу болуп ажылдаан. 2024 чылда ТР-ниң Кадык камгалал яамызының Хүндүлел бижии-биле шаңнаткан.
Меңги Дадар-оол национал төлевилел шугуму-биле Тываның эмнелге албан черлеринге келген амгы үениң бедик технологиялыг дериг-херекселдерин ажыглаарын эмнелге практиказынче чедиишкинниг киирип, иштежилери-биле кады хирургияның улуг чара кезиишкин кылбас чаа хевирлерин шиңгээткен. Меңги Сылдысовичиниң аарыг кижилери эмчизиниң дугайында чүгле чылыг сөстерни чугаалаарлар.
Меңги Дадар-оол амгы үеде Камчатка крайның онкология диспансеринде ажылдап турар. Июль 30-де ол регионга 1952 чылдан бээр болуп көрбээн улуг, 8 баллдан өрү күштүг чер шимчээшкини болган. Онколог эмчилер кезиишкин кылып турар үеде силгиишкин эгелээн, ынчалза-даа олар ажылын ара кагбайн, дидим чоруун көргүскен.
Россияның Президентизи Владимир Путин кезиишкин үезинде нарын берге байдалдарда эрес-дидим чоруун көргүскени дээш, диспансерниң дөрт эмчизин Пирогов орденнери-биле шаңнаан, оларның аразында Тываның чурттакчызы Меңги Дадар-оол база бар.
Республиканың 1 дугаар эмнелгезиниң хирург-травматолог эмчизи Эргил Чадамба Пирогов ордениниң Тывада бирги кавалери ол.
ТМГ-ниң медээлеринден.
“Шын” №37 2025 чылдың сентябрь 25