Сбербанк бойдусту хумагалап камнаар угланыышкынныг «Крышкам крышка 2.0» деп төлевилелди боттандырып турар.
«Крышкам крышка 2.0» деп экологтуг төлевилелдиӊ шугуму-биле Сбербанкыныӊ ажылдакчылары 1,4 тонна пластик сава аастарын чыып алгаш, ону узун сандай биле бок чыыр урна кылдыр болбаазырадыр бүдүрүлгеже дужаапкан.
2022 чылда 41 узун сандайны, 9 бок урназын шак ынчаар болбаазырадып кылдырып алгаш, Сибирьниӊ хоорайларынга хуваап үлээн.
Красноярск хоорайда Енисей хемниӊ Солагай эриинде улустуӊ селгүүстеп агаарлаар черинге 10 узун сандайны тургускан. Новосибирскиниӊ Сосновый бор деп парыгынга, Омскиниӊ Воскресенский сесерлиинге, Томскунуӊ «Буревестник» стадионунга, Топки хоорайныӊ «Цементник» культура-дыштанылга төвүнге, Тыва Республика биле Кемерово областа кезек эрге-чагырга албан черлериниӊ бажыӊнарынга, Сбербанкыныӊ офистеринге узун сандайларны, урналарны кылып берген.
Бо чай төнүп турда, Алтай биле Хакас республикаларга 70 узун сандай болгаш урналарны кылып бээр деп турар.
«Бойдусту хумагалаары Сбербанкыныӊ чугула угланыышкыны болуп турар. Пластик бокту аӊгылааш, ону болбаазырадылгаже дужаар угланыышкынныг «Крышкам крышка 2.0» деп төлевилелди бистиӊ ажылдакчыларывыс сеткилинден деткип турар. Ынчангаш экология талазы-биле кол эгелекчи саналывыс ол болган. Бо ажылга хөй күш херек, чүге дизе чаӊгыс узун сандайны кылырынга 45 кил ажыг пластик херек.
Эрткен чылга деӊнээрге, бо чылын элээн хөй пластик бок артынчыларын чыып алган бис. Ооӊ ачызында бо чылын узун сандайларны, урналарны элээн хөйнү кылдырар бис» – деп, Сибирьниӊ Сбербанкызыныӊ оралакчы даргазы Татьяна Черникова чугаалаан.
Сбербанкыныӊ парлалга албаныныӊ медээлеринден Р. Демчик белеткээн.