«Өөредилге» национал төлевилелдиң «Аныяк профессионалдар» деп федералдыг төлевилелинге Шагаан-Арыгның тудуг техникуму киришкеш, 2022 чылда грантыны ойнап алган. Шаңнал акшазынга электриктер болгаш каңнакчылар белеткээр 5–5 олуттарлыг ийи мастерскаяны ажыткан. Амгы үении-биле дериттинген мастерскаяларда техникумнуң сургуулдарын практика кырында электри удазыннарын кожарын мастер башкы Уран Дадар-ооловна Дукар, каңнакчы ажылды мастер башкы Альберт Александрович Лагбы өөредип турар.
Бо өөредилге чылының эгезинде федералдыг төлевилел-биле кожууннуң школаларының улуг класс өөреникчилеринге келир үеде мергежил шилип алырынга дузалаар кылдыр практиктиг өөредилгени эрттирип эгелээннер. Бо хүнге чедир 60 өөреникчиге практиктиг өөредилгени эрттирген.
Бо удаада Шагаан-Арыгның школа-гимназиязының 8-ки классчыларынга практиктиг өөредилгени эрттирген. Айыыл чок чорукту сагыырын өөренмишаан, өөреникчилер аразында сонуургалдыг оолдар бо ажылды херек кырында холу-биле тудуп кылып өөренгеннер.
Каңнакчыларның мастер башкызы Альберт Лагбы демир кескиндилерин кожа хайындырарын өөреткен. Аңаа база өөреникчилер улуг сонуургал-биле кескинди демирлерни кожуп өөренгеннер.
«Улуг-Хем» солуну.
“Шын” №87 2024 чылдың ноябрь 13
