Тываның чурттакчы чону РФ-тиң Президент соңгулдазының бир дугаар хүнүнде бедик көдүрлүүшкүннүг бадылап эгелээн. Үш хүн үргүлчүлээр соңгулданың бир дугаар хүнүнде, март 15-те, бүгү республикага 187 соңгулда участогу 8 шак 00 минута турда ажылын эгелээн.
Найысылал Кызылдың Южный микрорайонунуң чурттакчылары дыка эртежи, 7 шак 30 минута турда-ла, 5 дугаар лицейниң баазазында соңгуур участоктарының даштынга чыглып эгелээн. Соңгулдага элээдилерден эгелээш, улуг назылыг хоочуннар, бүдүн өг-бүлелер хөйү-биле соңгуп келген.
Тываның Баштыңы Владислав Ховалыг база өөнүң ишти-биле 29 дугаар соңгулда участогунга 10.00 шакта келгеш, соңгаан.
«Республикада шупту соңгулда участоктары кандыг-даа болуушкун чокка ажылын эгелээн. Даң бажындан тура өг-бүлелер байырланчыг хөөннүг соңгуп кээп турары өөрүнчүг-дүр. Республика демниг болгаш эп-найыралдыг соңгуур дээрзинге бүзүреп тур мен. Бис ону шыдаар бис. Ылаңгыя Россияның Президентизиниң соңгулдазы дээрге улуг төөгүлүг болуушкун-дур. Ооң түңнелинден чуртуң даштыкы болгаш иштики хөгжүлдези хамааржыр.
Ынчанмайн аан, кымны бадылаары, келир үезин соңгууру кижиниң бодунуң херээ. Ынчалзажок бодунуң делегейин, үнелиг чүүлдерин кадагалаары, амыдыралын хевирлеп тургузары чугула. Россия демниг, каттышкан чаңгыс сорулгалыг болгаш келир үеже бүзүрелдиг деп чүүлдү бүгү делегейге шынзыдар ужурлуг бис.
Мен хамаарышпас чорук дээш, шынчы болгаш күштүг Россия дээш бадыладым. Кады улуг күш бис! Россия дээш бадылаңар!» — деп, Владислав Ховалыг чугаалаан.
28 дугаар соңгулда участогунда даңзы аайы-биле 2100 соңгукчу барын ук участоктуң даргазы Рада Александровна Ондар дыңнаткан: «Соңгукчуларывыс даң бажындан тура идепкейлиг кээп эгеледи. Соңгулдалар үезинде видеохайгаарал ажылдап турар. Корум-чурумну полиция ажылдакчылары тудуп тур. Аңгы-аңгы партиялардан 4 хайгааракчы бүрүткелди эрткеш, хайгааралды чорудуп турлар. Соңгулда үезинде арыг-силигни тудары-биле, мурнунда хүн улуг арыглаашкынны кылган. Соңгулдалар болур хүннерде бо 5 дугаар лицейниң ажылчыннары үргүлчү аштап-арыглап турар. Ол ышкаш дезинфекцияга херек чүүлдер, маскалар бар. Ынчангаш бистиң участокта арыг-силиг, эки байдалды соңгукчуларга тургускан».
Лицейниң бир ужунда 29 дугаар соңгулда участогунда база кижи эвээш эвес, соңгукчулар узун оочурда.
«Бөгүн 29 дугаар соңгулда участогунуң соңгукчулары дыка хөй келген. Соңгулда эгелевээнде-ле, 7 шак 30 минута турда келгеш, дыка хөй кижи эжик аксынга оочурлап туруп алдылар. Соңгукчуларывыс хөйүнге бөгүн бажывыс көдүрбейн ажылдаар боор бис. Соңгукчулар дыка идепкейлиг, бедик көдүрлүүшкүннүг кээп турлар. Оларның аразында эң-не аныяа 18 харлыг, улуг назынныглары 80–90 харлыг хоочуннар-даа бар. Бир дугаар соңгуп келген соңгукчуларны суй белектер-биле өөртүп турдувус» — деп, 29 дугаар соңгулда участогунуң секретары Зоя Кылын-ооловна Ондар чугаалады.
Ылап-ла бүдүн Тыва Президент соңгулдаларының бир дугаар хүнүнде-ле идепкейлиин көргүзүп турары дээрге-ле чоннуң хамааты хүлээлгезин күүседип, бодунуң шилилгезин шын кылып билириниң бадыткалы-дыр.
А. СОЯН.
Чингис СААЯНЫҢ тырттырган чуруктары.
«Шын» №20 2024 чылдың март 16
