Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев күрүне баштыңының көжүп чоруур хүлээп алыышкынының үезинде, Россияның Президентизи Владимир Путинның адынче дилег бижиктер киирген Хакас Республиканың чурттакчылары-биле видеохарылзаа дамчыштыр хууда ужуражылганы эрттирген.
Черногорск хоорайдан хөй ажы-төлдүг ие хоорайның эң-не эрги өөредилге чери – 1 дугаар ортумак школа муниципалдыг бюджет өөредилге албан черинге капитал септелгени кылып бээрин дилээн.
Школаның оран-савазы эргижирээнинден, кырын, төп чылыдылгазын, чырык удазыннарын бүрүнү-биле солууру, өртке удур чаа системаны салыры, даштын чаартыры, девискээрин чаагайжыдары негеттинип турарын бижээн. Хууда хүлээп алыышкын соонда, регионалдыг эрге-чагыргага школаның капиталдыг септелгезин организастаар болгаш боттандырар хемчеглерни дарый чорударын дагзып, ону 2027 чылга чедир доозарын бүрүн эргелиг төлээ айыткан.
Беш муң хире херээжен чоннуг Усть-Абакан районнуң Усть-Абакан суурнуң бир чурттакчызы күрүне баштыңының хүлээп алыышкынынче дүрген эптеп тургузар модульдуг херээженнер консультациязын тудуп бээр дилегни киирген. Бүрүн эргелиг төлээ келир чылдың август эгезинге чедир эмнелге черин тудуп, ажыглалче киирерин дааскан. Аңаа ийи акушер-гинеколог өрээлдери, эмнээшкин-диагностика, тускай эртемниг эмчилер өрээлдери, хүндүскү эмнээшкин чери, ажык хевирниң регистратуразы, сыкыртыр өрээл, херээжен чонга психологтуг болгаш эмчи-социал дуза өрээли, функционалдыг диагностика өрээли, УЗИ өрээли, ие-чаштарга өрээл турар.
Аскиз районнуң Пуланколь суурдан эге класстар башкызы күрүне баштыңының хүлээп алыышкынынче суурда спортчу шөл чогун дыңнаткан. Россияда Күш-культуржунуң хүнү – 2026 чылдың август 5-ке чедир ону тударын бүрүн эргелиг төлээ суурга дааскан.
Республиканың Аскиз районнуң Аскиз суурда Горький кудумчузунда хөй квартиралыг бажыңның чурттакчызы бажыңның инженер системалары болгаш кыры аварийлиг байдалда келген дээрзин дыңнадып, капитал септелге чорударынга дузалажырын дилээн. Анатолий Серышев хууда ужуражылга соонда, инженер системаларга, ооң иштинде суг, чылыг хандырылга четкилеринге капитал септелгелерни 2026 чылдың одалга сезону эгелээр мурнунда доозарын айыткан.
Таштып районнуң чурттакчызының күрүне баштыңынче киирген дилээнге даянып, Таштып – Карагай автомобиль оруунда 6,7 километр ажыг узун участокка капитал септелгени кылыр дугайында шиитпир хүлээп алдынган. 2026 чылдың майда ажылды эгелээш, ол-ла чылдың сентябрьда доозар ужурлуг. Оруктуң шывыын солууру-биле, сай-довуракты төп, асфальт-бетонтан үстүкү каъдын чадып, кыдыкы чалдарын быжыглап, кылымал баганаларын септеп, автомобиль оруун экижидерин дааскан.
ТР-ниң Чазааның парлалга албаны.