Россияның Президентизи Владимир Путин “Россия Федерациязынга долу эвес мобилизацияны чарлаар дугайында” Чарлыкка холунуң үжүүн сентябрь 21-де салган. Ол хүнден Россияның бүгү регионнарынга долу эвес мобилизацияны чорудар талазы-биле ажылдарны шериг комиссариаттары эгелээн.
Долу эвес мобилизацияны чорударының чылдагааннарын Владимир Путин чонга кыйгырыг чугаазынга тайылбырлаан. Долу эвес мобилизацияны чорударын “Россияга диргелип келген айыылга удур эргежок чугула харыы” деп адаан. Россияның хамаарышпас чоруун болгаш девискээриниң бүдүн-бүрүнүн камгалаарынга, российжи чонну болгаш Украинада хостаткан девискээрлерниң чурттакчыларын айыыл чок чоруун хандырарынга долу эвес мобилизация эргежок чугула деп чугаалаан.
Коллективтиг барыын чүк күрүнелериниң кол сорулгазы Россияны сандараткаш, шаа барып шуут чок кылыры, ону эгелээр девискээр кылдыр Украинаны шилип алган деп Владимир Путин демдеглээн. Украинада амгы үеде чоруп турар дайынчы хөделиишкиннерни Россияның девискээринче шилчидеринче Американың Каттышкан Штаттары, Великобритания болгаш Европа эвилелиниң чурттары Украинаны албадап турар деп Путин айыткан. Массалыг өлүрүүшкүннүң ядерлиг чепсээн ажыглап болуру-биле барыын чурттар кыжанып турарын база ол чугаалаан. “Долу эвес мобилизацияны чорударының дугайында Камгалал яамызының болгаш чиңгине штабтың саналын деткиири кончуг чугула деп санаар-дыр мен. Долу эвес мобилизация дугайында чугаа чоруп турар, амгы үеде халажылгада хамаатылар, хамыктың мурнунда Чепсектиг Күштерге шериг херээ эрттирип чораан, шериг даңзызынче кирген мергежилдерлиг болгаш дайынчы арга-дуржулгалыг кижилерни шеригже кыйгыртыр” деп, В. Путин тайылбырлаан.
Долу эвес мобилизация дугайында Чарлыкты Россияның Президентизи үндүрериниң мурнуу чарыында Россия Федерациязының Кеземче кодекизинче өскерилгелерни Күрүне Думазы киирген. Оларны Күрүне Думазының депутаттары дораан хүлээп алган. Долу эвес мобилизация болгаш дайын байдалдарының үезинде российжи хамаатыларга онаап болур кеземче хемчеглерин ол чүүлдерде быжыглаан.
КАМГАЛАЛ САЙЫДЫНЫҢ ДААЛГАЗЫ
Россияның Президентизи Владимир Путинниң Россия Федерациязынга долу эвес мобилизация дугайында Чарлыын күүседир талазы-биле даалгаларны камгалал сайыды Сергей Шойгу берген.
Долу эвес мобилизация дугайында хамаатыларга өй-шаанда чарлаарын эки шынарлыг организастаарынче, чөңгээлиг болгаш хоойлу-дүрүмге дүүшпес хөделиишкиннерге удур чүүлдерге хамаарыштыр хемчеглерни шыңгыырадырынче, ол ышкаш дыңнадыышкыннар тарадыр участоктарның, долу эвес мобилизацияже келдирткен кижилер чыглыр болгаш оларны хүлээп алыр пунктуларның камгалалын күштелдиреринче камгалал сайыды кичээнгейни угландырган.
Долу эвес мобилизацияже дайынчы арга-дуржулгалыг хамаатыларны колдады келдиртирин, шериг өөредилге черлериниң студентилеринге болгаш керээ чарбаан солдаттарга долу эвес мобилизация хамаарышпас дээрзин Сергей Шойгу чугаалаан.
Аар кем-херек үүлгеткен дээш, кеземчезиниң хуусаазы төнмээн кижилерни база долу эвес мобилизацияже келдиртпес.
Амгы үеде керээ ёзугаар шериг херээ эрттирип турар шериг кижилерниң керээ дугуржулгазын долу эвес мобилизацияның төнер хуусаазынга чедир узадыр.
Россияның регионнарында шериг комиссариаттары долу мобилизация талазы-биле ажылдарны амгы үеде чорудуп турар.
РЕФЕРЕНДУМНАР
Луганск болгаш Донецк Улус Республикалар, ол ышкаш российжи эрге-чагырганың контролюнда Запорожец биле Херсон областар Россия Федерациязының составынче эки тура-биле кирериниң референдумнарын эрттирер деп шупту хары угда шиитпирлээннер. Референдумнарны эрттирериниң хуусаазы 2022 чылдың сентябрь 23 – 27 хүннер.
Россияның Президентизи Владимир Путин Луганск болгаш Донецк Улус Республикаларның, Запорожец биле Херсон областарның Россия Федерациязының составынче эки тура-биле кирерин российжи эрге-чагырга деткиирин дыңнаткан.
ТУТТУРГАННАРНЫ СОЛУШКАН
Россияның украин девискээрде чорудуп турары тускай дайынчы операциязының дайынчы хөделиишкиннериниң үезинде туттурган шериглерни российжи болгаш украин талалар сентябрь 22-де солушкан. Туттурган 55 российжи дайынчыны украин тала Россияга дамчыдып берген. РФ-тиң Камгалал яамызының шериг-транспорт самолёдунга ол дайынчыларны Россияның девискээринге эккелгеш, шеригниң эмнелге албан черлеринге оларның кадыкшылын экижидери-биле чыттырган.
Тускай дайынчы операция үезинде российжи Чепсектиг Күштерниң дайынчыларынга туттурган 215 шериглерни украин талага Россия дамчыдып берген.
КЫДАТТЫҢ ХАМААРЫЛГАЗЫ
Россияның Президентизи Владимир Путинниң Россия Федерациязынга долу эвес мобилизация дугайында чарлыынга Кыдаттың хамаарылгазын тайылбырлап тура, Кыдат Улус Республиканың Даштыкы херектер яамызының төлээзи Ван Вэньбинь: “Дайынчы хөделиишкиннерниң киржикчилери ийи таланың кайызынга-даа хан төгүүшкүннүг тулчуушкуннарны соксадырын, аразында харылзааларны тудуп, дугуржуушкуннарны чорудуп тургаш, чидиг айтырыгга чөптүг шиитпирни тыварын сүмелеп турар бис” – деп чугаалаан. Ону боттандырар дээш, делегей күрүнелериниң чорудуп турар ажылынга Кыдат каттыжып турарын база Кыдаттың даштыкы херектер яамызының төлээзи демдеглээн.
ВЕНГРИЯНЫҢ ДҮВҮРЕЛИ
Россияның Президентизи Владимир Путинниң Россия Федерациязынга долу эвес мобилизацияны чарлааны Россия болгаш Украина-биле кожа-хелбээ чурттарга дүвүрелди доюлдурган.
Россия биле Украинаның аразында шериг-политиктиг чөрүлдээлерни дугуржуушкуннар-биле соксадырынче Венгрияның удуртулгазы российжи-украин талаларны кыйгырган. “Бис Украинаның кожазы болгаш, чүгле тайбыңдан өске күзээр чүүлүвүс чок. Россия биле Украинаның удуртукчуларын, делегей политиказынга күштүг киржикчилерни дүрген дугуржурунче, тайбыңны чедип алырынче кыйгырып тур бис” – деп, Венгрияның даштыкы херектер сайыды Петер Сийярто чугаалаан.
(Россияның информация агентилелдериниң ажык
медээлеринден белеткээн).
