Москваже ажыл-агыйжы сургакчылаашкын үезинде Тываның Баштыңы Владислав Ховалыг Россия Федерациязының Чазааның Даргазының оралакчызы Денис Мантуровка ужурашкаш, бо чылдың сентябрь 2-де Президент Владимир Путинниң Тывага эрттирген хуралынга чугулалап демдеглеттинген республиканың социал-экономиктиг хөгжүлдезиниң айтырыгларынга хамаарыштыр чугааны чоруткан.
РФ-тиң Чазааның 2021 чылдың декабрь айда бадылааны Тываже үлетпүрнүң инвестиция төлевилелдерин электри энергиязы-биле хандырылгазының комплекстиг планын канчаар боттандырарынга Владислав Ховалыг биле Денис Мантуров тодаргай доктааганнар. Чүге дээрге комплекстиг планны боттандырарындан Тываның хоорай, суурларының электри энергиязы-биле хандырылгазы база хамааржыр. Чижээлээрге, Ак-Сугда чес-порфир чыдынын шиңгээдип алыры-биле тудуп турар даг-болбаазырадылга комбинадынче шөйүп чорудуп эгелээн магистралдыг электри шугумунга Тожу кожууннуң суурларын кожары бо кожууннуң социал-экономиктиг хөгжүлдезинге улуг ужур-дузалыг. Чуртталга болгаш бүдүрүлге тудуглары көвүдеди туттунуп турар апарган Кызыл хоорайның электри энергиязы-биле хандырылгазын күштелдирери база РФ-тиң Чазааның 2021 чылдың декабрь айда бадылааны комплекстиг планда көрдүнген.
Россияның чөөн талакы экономиктиг хөгжүлдезиниң угланыышкыны-биле Тывадан хөмүр-дашты үндүр сөөртүрүнүң айтырыгларын Владислав Ховалыг биле Денис Мантуров сайгарып чугаалашканнар.
Бир эвес бо төлевилелди чедиишкинниг боттандырар болза, чөөн угланыышкынче тыва хөмүр-дашты үндүр садар компанияларның республиканың бюджединге киирер үндүрүглери көвүдээр ужурлуг.
Тываның чурттакчы чонунга хөмүр-даш өртээ чиигелделиг болур дугайында айтырыгны РФ-тиң Чазааның Даргазының оралакчызы биле Тываның Баштыңының ужуражылгазының үезинде чугаалашкан. Бо социал айтырыгны чогумчалыг шиитпирлээриниң аргаларын дилеп тывар даалганы ажыл-чорудулгазы аңаа хамаарылгалыг яамыларның удуртулгаларынга Денис Мантуров берген.
Тываның Баштыңы Владислав Ховалыгның Москваже ажыл-агыйжы сургакчылаашкынының кол сорулгаларының бирээзи – Тывага чиигелделиг ипотеканың программазының хуусаазын узадыры. Бо айтырыгны РФ-тиң тудуг болгаш чуртталга-коммунал ажыл-агый сайыды Ирек Файзуллин-биле Тываның Баштыңы чугаалашкан. Бистиң республикага чиигелделиг ипотека Президент Путинниң сентябрь 2-де берген даалгаларының санынче кирген болганда, ол чогумчалыг шиитпирлеттинип болурунуң аргазы бар дээрзинге идегел бар.
Ш. МОНГУШ белеткээн.
Чурукту интернет четкизинден хоолгалаан.
«Шын» №82 2024 чылдың октябрь 26
