Дүүн, май 20-де “Президентиниң спортчу оюннары” деп школачылар аразынга Бүгү-российжи спортчу оюннарның регионалдыг чадазының ажыдыышкыны болуп эрткен. Маргылдааның девискээр аайы-биле болган чадазының тиилекчилери болур 5 команда 3 хүн дургузунда бүгү-российжи түңнел чадага киржири-биле ойнап турарлар.
Кызыл хоорайда Барыын-Хемчик, Чөөн-Хемчик, Кызыл, Чеди-Хөл, Бии-Хем кожууннардан девискээр аайынче чаданың тиилекчилери киржип турар. Команда бүрүзү 2008-2009 чылдарда төрүттүнген 6 оол, 6 уругдан тургустунган.
Маргылдаада спортчу оюннарның хол бөмбүү, баскетбол, чиик атлетика, стол теннизи, спортчу туризм, черниң уг-шиин тывар спорттуң хевири, мини-футбол кирип турар. Бир дугаар хүнде чиик атлетика болгаш баскетбол маргылдаазы болуп эрткен.
Маргылдааның регионалдыг чадазынга тиилээн команда “Смена” уруглар төвүнге сентябрь айда болуп эртер бүгү-российжи чадага Тываны төлээлеп киржир.
