Бо чайын республикага школачыларның чайгы дыштанылгазының үезинде уругларның идепкейлиг, ханы уткалыг болгаш айыыл чок хостуг үезин хандырар сорулгалыг 200 ажыг түр үениң дыштанылга төптери ажыттынып, график ёзугаар ажылдап эгелээн.
Найысылалдың 19 дугаар школазында «Профи» деп хүндүскү лагерь уругларга бодунуң эжиин ажыткан. Хүннүң-не уругларны өңгүр чараш болуушкуннар болгаш сагыш-сеткил көдүрлүүшкүнү манап турар. Ынчалза-даа эң-не кол чүүл — янзы-бүрү мергежилдер-биле уругларны таныштырары.
«Профи» хүндүскү лагерьде шупту чүвени тодаргай расписание ёзугаар организастаан. Хүн бүрүзү долу болгаш солун болзун дээш бүгү чүвени таарыштыр тургускан. Баштай сула шимчээшкин, оон амданныг эртенги чем. Ооң соонда эң-не солун чүүл: арыг агаарга оюннар, чогаадыкчы мастер-класстар, спортчу маргылдаалар болгаш оон-даа өске.
Кол чүүл – мергежилдер делегейи-биле таныжарының дугайында уттуп болбазы. Лагерьге анаа-ла ойнап хүнзевес, а өөренип база турар. Дараазында хүннерни кандыг-бир мергежил-биле холбашкан тодаргай темаларга тураскаадыр.
Ынчангаш лагерьге хүн бүрүзү – бичии ужурал, чалгаараар болгаш гаджеттер-биле олурар үе чок. Маңаа чаа эш-өөр-биле таныжып ап, чаа чүүлге өөренип база солун, хөглүг үени эрттирип болур. Лагерьде дөрт отрядта сезен уруг кээп турар.
Кижизидикчи башкылар болгаш вожатыйлар – ёзулуг профессионалдар. Олар бичии уруг бүрүзүнүң салым-чаяанын ажыдарынга дузалажып, хей-аът киирип, деткип турарлар.
«Профи» деп хүндүскү лагерь сес шак үженден он дөрт шак үженге чедир ажылдап турар. Уругларны хүнде ийи катап чемгереринден аңгыда, хөглүг, солун программалар манап турар.
Өөредилге яамызының шугуму-биле немелде өөредилге шөлдеринге 18 түр үениң дыштанылга төптери ажылдап, 7-ден 17 хар чедир назылыг 1200 ажыг школачыларны хүлээп алыр. Уругларга чуруур, чазаныр бөлгүмнер ажылдаар, спортчу хемчеглер эртер. Хемчеглер мөзү-шынар кижизидилгезинче, угаан-бодал болгаш бүгү талалыг чогаадыкчы сайзыралче база кадыкшылче угланган болур.
Ол ышкаш спорт база культура адырларының аайы-биле дыштанылга төптери ажылдаар. Бо чылын «Алгоритмика» чайгы хуу школа, Тываның Республиканың лицей-интернадынга чайгы математика школазы, Иван Ярыгин аттыг спорт комплекизи, К.Б. Ондар аттыг тыва культура төвүнде «Чайлаг» лагери түр үениң дыштанылга төптериниң даңзызынче кирген.
Чижээлээрге, Тыва үндезин культура болгаш ус-шеверлер хөгжүлдезиниң төвүнүң чанында этнокультурлуг угланыышкынныг «Чайлаг» чайгы дыштанылга төвү 8–14 харлыг чээрби хире школачыга дыштанылганы организастаар. Уругларга тыва чоннуң чаңчылдары болгаш уран чүүлүнүң дугайында билиглерин суртаалдаан программаны организакчылар белеткээн. Игил, бызаанчы, дошпулуур дээн ышкаш, тыва хөгжүм херекселдери-биле таныжып, национал оюннарны өөренип, хөөмейлээриниң эге чадаларын шиңгээдип, тыва дылды өөренип, малчын аалче экскурсиялаар.
Бистиң корр.
Чуруктарны интернеттен алган.
«Шын» №21 2025 чылдың июнь 5
